في بيان علي الفيسبوك من صفحة مكتوب عليها الصفحة الرسمية للملك فؤاد التاني... منزلين خبر وصور زواج ابنة الملك فؤاد الي اسمها فوزية من مهندس ألكترونيات فرنسي اسمه سيلفان رينودو اللي واضح انه أعلن إسلامه ليتزوجها
وكاتبين إن كتب الكتاب اتعمل في سويسرا اللي عايش فيها ابوها وتم علي الطريقة الاسلامية السنية... واللي جابوا شيخ مخصوص من فرنسا عشان يكتبه... وقالوا ان حضر كتب الكتاب ستين شخص علي رأسهم جلالة الملك فؤاد الثاني وولي العهد سمو الامير فلان والامير علان والامير ترتان... ده غير بردو شوية شقلة سموات اميرات مذكورة اسماءهم
علي فكرة كل ده عادي... واحدة بنيآدمة وبتتجوز... وبيسموها اميرة واللي كان في الزمانات جدها ملك مصر واتشال في سنة 1952 واتنازل عن الحكم لابنة اللي كان بيبي في اللفة... واتلغت الملكية بعد كده في سنة 1953
كل اللي فوق ده عادي... اللي مش عادي بقي تعليقات الناس علي البوست ده... والندب واللطم علي الملكية والملوك وولاد الاصول وشوفوا الرقي والله علي الشياكة وياسلام علي حكام مصر الاصليين... والبكائيات علي حكم الملك فاروق الي جاء ياحرام عبد الناصر بانقلابه العسكري وشاله
والشعب الوحيد الي اتلعب في اساس افكاره... وقدر الاخوان ولاد الو*** انهم يخلوه يحن لايام ولت ونظام حكم انتهي... وتلاقي واد بتلات تعريفة مسقط بنطلونه يقولك احنأ اسفين يافاروق... ولا بت ماطلعتش من البيضة وماتعرفش تفك الخط شغالة كربلائيات علي ايام الملك فقط كرها في عبد الناصر الي كان في الواقع هو اول مصري يحكم مصر... يمكن من ايام الفراعنة
البلد الوحيدة الي تلاقي جزء من اهلها قاعدين يحنوا للملكية... مع ان كلامهم عن الديمقراطية والانتخابات وتداول السلطة وشرعية الصندوء لاتنقطع وعلي قدم وساق ليل نهار... اتلغت الملكية في فرنسا واغلب الدول العربية وماشوفناش ناس طالعة تطالب بعودة الملكلية وأسياد البلد الاصليين الا في مصر
فوقوا بقي فيه ايه... اللي انتم مسمينهم ولاد الاصول والملوك واملاك الاسرة الي اخدها عبد الناصر... مصر هي الي عملتهم ملوك وبني آدمين ويبقي عندهم املاك من دم وخير البلد دي
انتم مش عارفين ان آل محمد علي دول مش مصريين واغتصبوا الحكم في مصر من زمان... انتم مش عارفين ان محمد علي ده من مواليد مقدونيا في اليونان من اصول ألبانية وهو وجدوده بياعين دخان... وانه ماكانش بيتكلم عربي اساسا
انتم مش عارفين انه لما قررت الدولة العثمانية إرسال جيش لمصر لانتزاعها من أيد الفرنساويين كان هو مش اكتر من نائب رئيس الكتيبة الألبانية اللي اتبعتت واصبح بعد كده قائدها وشارك في الحروب علي المماليك واتولي حكم مصر بعد تودده للمصريين فصدر فرمان عثماني بتوليه حكمها
انتم مش عارفين ان محمد علي قضي علي المماليك في مذبحة القلعة وبعد ما حارب الانجليز في حملة فريز قرر يقضي علي الزعامات الشعبية المصرية بقيادة عمر مكرم بمنتهي الخسة الي كان هو اساسا السبب في وصوله لحكم مصر والغاء الفرمان العثماني بعزله
انتم مش عارفين ان بسبب الحملات العسكرية الي عملها محمد علي علي الحركة الوهابية والشام واليونان والسودان وفرض سلطته وسطوته وطموحه علي تلك الاماكن كانت سبب ان السلطان العثماني يتنازل ويمنحه فرمان بولاية مصر وجعلها وراثية في اسرته
ولو هو اغتصاب الملك بيدي الاحقية للابد في حكم البلاد وبيدي جنسيتها لاسرة محمد علي اللي مايتقالش عليهم اكتر من ألبان مغتصبين لحكم مصر... يبقي عادي بقي اغتصاب اليهود لارض وحكم فلسطين هيبقي شرعي وواقع تاريخي وحق ابدي لهم بعد كده
فوقوا بقي وبلاش مرض العودة للماضي والحنين للعبودية واجترار احداث لاتعلمون عنها شيئا... وياريت بقي شوية العيال السيس الي عايشين دور عبده الأليط ولاد البشوات يفتحوا كتاب شوية ويقروا فيه تاريخ بدل الهرتلة الفارغة الي هم عايشين فيها دي
بس كده
تابعوا أخبار بلدنا اليوم على Google News
