قال الإعلامى أسامة كمال، إن "مصر النهارده بتصرف كتير على تحسين كل حاجة فى مصر إلا تحسين الثقة في النفس والثقة فى الوطن والثقة فى المؤسسات. بنصرف مليارات لعلاج أمراض عضوية، ورغم إن ده ما حصلش فى تاريخ الأمم ما حصلش أن دولة تنزل تكشف ع الشعب كله، إنما زى ما بنعمل كل المجهود ده فى علاج أمراض عضوية".
وأضاف كمال في برنامجه مساء DMC اليوم الجمعة ، عندنا أطنان أمراض نفسية فلازم نلاقى مليارات تتصرف على حاجات تخللي في ثقة فى البلد ومؤسساتها، ونصرف مليارات أكتر عشان الشباب الصغير يلاقى فرصة إنه ينجح فى بلده، بدل ما يدور عليها فى بلد تانى.
وتابع كمال،" نتخلص من قيادات شغلتها الإحباط وتفشيل الناس بتشدنا كلنا لورا ونرجع نسأل هو فلان كان ماشي كويس أمال حصل له إيه، حصل له إن حد شده لورا زي اللي يشد لعيب من الفانلة عشان مايجيبش جون، فتلاقي العقم التهديفي بلغة الكورة هو السائد، ولازم كلنا نبقى اسطمبا من بعضنا".
وأتم" :أجدع واحد فينا مابيعديش خط النص، كلنا باكات بنطفش من على منطقة جزاءنا، فسهل يدخل فينا اجوان، كلنا خايفين من الأوفسايد وعاملين حساب اللي ممكن يكسرنا زي ما راموس كسر صلاح، بس كسرة صلاح بتخف ولو بعد حين، بس اللي بيشدونا لورا، كسرتهم في أحسن الأحوال تجيب اعتزال".
تابعوا أخبار بلدنا اليوم على Google News
