السيسي للمواطنين: اتحملونا وإحنا بنحاول بأكبر قدر ممكن ننجز المشروعات

قال الرئيس عبدالفتاح السيسي: لو لم نقم بـ إنشاء تلك الطرق التي تم إنشاؤها بالقاهرة، خلال الأربع خمس سنوات السابقة كانت القاهرة أصيبت بشلل كامل، وحجم العمل اللي اتعمل في هذا المجال غير مسبوق، ولكن نتائجه هائلة في خفض التلوث وتوفير الوقود وتيسير الحركة.

ووجه الرئيس رسالة للمواطنين قائلًا: اتحملونا وإحنا بنحاول بأكبر قدر ممكن ننجز المشروع.

وتابع الرئيس: لما خلصنا القاهرة الجديدة ومحاور الربط وطرق غرب القاهرة دخلنا في الجنوب، طرق الجنوب زحمة جدًا وفي كتلة سكانية كبيرة، اللي إحنا بنعمله ده بيعمل حاجتين، بيكمل ربط وسط القاهرة بشرق القاهرة، بحيث يتيح الحركة للمواطنين، مشيرًا إلى أنه بعد الانتهاء من مشاريع الطرق شعر المواطنون بأن ما حدث كان إضافة.

واستكمل: النقطة التانية إن المحور ده موازي لطريق صلاح سالم، يعني أنا النهاردة عشان أخليك تطلع على كوبري السيدة عيشة على القلعة وتروح داخل على صلاح سالم أو تخش على طريق السكة البيضة، لا دا أنا عملت لك محور جديد أخليك تقدر تخش منه لغاية القاهرة الجديدة.

ولفت الرئيس السيسي: الطرق والمحاور دي بتكلف تكلفة كبيرة، التكلفة دي بحجم الحركة اللي هتيسرها، وحجم الوقود اللي هيتخفض، وحجم التلوث اللي هينتهي، وحجم الفرص اللي هتتنشأ من في أراضي كانت غير متاحة هيتم إتاحتها من خلال الطرق دي ممكن يتعمل عليها خدمات، زي طريق الكرونيش لما قالولنا قولتلهم لا وسعوا على الناس واعملوا كورنيش جميل خلي الناس الموجودة في المقطم تسعد بيه.