بالفيديو.. الشيخ عبد الله رشدي وقصة الـ "مليون دولار الحرام وحكاية أبو فلة"

علق الشيخ عبد الله رشدي، على قيام اليوتيوبر المعروف باسم "أبو فلة" بجمع ميلون دولار، من أجل دعم اللاجئين السوريين.

وقال عبدالله رشدي في مقطع فيديو: "دلوقتى واحد نجح، وجمع الناس حوله وقدر أنه يجمع مبلغ للاجئين، الذين اصيبوا بترك ديارهم وأموالهم وأزواجهم وأولادهم، ناس شردوا من حياتهم حرفياً".

وتابع: "أبو فلة، رجل قدر يدخل على الإنترنت ويستغل خدماته وشهرته في أنه يجمع للناس دي مليون دولار، وقدر يجمع الفلوس فعلاً بفضل الله سبحانه وتعالى".

وواصل رشدي: "هل نقطع في فروة الراجل، نقول أن الكلام دا غلط، الناس اللي تعمل كدا يا أما حاقد أو جاهل، أبو فلة قدر يعمل اللي ناس كتير معرفتش تعمله".

وأكمل حديثه: "الناس الجاهلة اللي قاعدة عماله تفتي وتقول الفلوس دي حرام، يا أخي الكريم أتركوا الحلال والحرام إلى أهله، إي الحرام في دا؟".

وأضاف: "الراجل لم يرتكب معصية، يبقي هنعترض على حاجه كويسه زى كدا ليه؟، يجب دعم الشخص الناجح الوقوف بجانبه بدلاً من التكسير فيه".

وتابع: "كفاية تكسير في بعض، ونتكلم في دين الله بما لا نعرفه، لما تشوف حد ناجح قول له الله يزيدك، الله يباركلك وربنا يدينا ونقدر نعمل زى ما أنت عملت، لكن ميكنش الحل تقطيم في الناس".