هيام تخلع زوجها: "بينسى ذكرى عيد زواجنا"

"بينسي عيد ميلادي وعيد جوازي ومش مهتم بيا".. بهذه الكلمات وقفت "هيام" البالغة من العمر 35 عامًا، تشكى ماساتها لقاضي محكمة الأسرة، مطالبة بالخلع من زوجها الذي يعمل محاميًا، وذلك بعد مرور عامًا على زواجهما، مبررة ذلك: "مش مهتم بيا ولا بيقدر الحب اللي بينا"

قالت الزوجة: "قبل الجواز مكنش فيه مناسبة ممكن تمر علينا إلا لما يفتكرها وكمان كان بيفكر أصحابي بعيد ميلادي كل سنة علشان مبقاش زعلانة، لكن بعد الجواز الموضوع اختلف بقيت أنا اللي بفكره بكل المناسبات اللي جمعتنا".

"أنا مش فاضي للكلام ده لازم اشتغل علشان أعرف أكفي طلباتك"، كان الرد الذي تستقبله الزوجة كلما تحدثت مع زوجها عن أسباب نسيانه المناسبات التي تجمعهم، في محاولة منه الاستخفاف بطريقة تفكيرها.

وتابعت هيام: "أنا تفكيري مش سطحى بس الحاجات دي أكيد بتفرق مع أي ست ومينفعش تتنسي لو كان افتكرني بوردة كنت هبقى مبسوطة"، تذكر الزوج مناسبات والدته وشقيقته، هو ما زاد الخلافات بينها وبين زوجها إلى أن وصل إلى الاعتداء عليها بالضرب لسطحية تفكيرها من وجهة نظره.

وأضافت: "أنا مش سطحية علشان أطلب الطلاق علشان نسي عيد ميلادي أو أي مناسبة ولكن أنا مبقتش موجودة في حياته غير صدفة يرجع البيت يدور فين الأكل، وبعدين ينام بقى فيه خرس زوجي بينا لدرجة إننا مبقناش نلاقي كلام نتكلم فيه".

خلافات زوجية وصراعات مستمرة جعلت "هيام"، تتخذ قرارها بطلب الطلاق بعد علاقة استمرت عام واحد لم تسفر عن إنجاب أطفال لشعورها بالإهمال من زوجها.