قال الإعلامي أسامة كمال، إن مصر ليس لها متحدث رسمى ولكن لها رموز وأخلاق وتفاصيل تتحدث عنها، مضيفًا: "مصر ليها كتير عملها ولادها المنورين فيها والمنورين براها، ممكن البعض زمان قبل فكرة الاستعلاء على المصريين وعداها النهارده الاستعلاء ما بيعديش لا من حد برانا ولا حد جوانا لا أقدر أعملها ولا أرضى بحد يعملها".
وتابع خلال برنامج "مساء DMC": "مصر مش شخص واحد عظيم ولا حاجة واحدة حلوة، مصر حاجات كتير حلوة وناس كتير حلوة وعظيمة، مصر مش مؤسسة واحدة لكن مؤسسات كتير، لما نقول الآثار ما بيكونش قصدنا الهرم بس، الهرم رمز للآثار.. ولما نقول الجندي المصري، يبقى الجيش كله ولما نقول الجيش المصرى، يبقى كل المؤسسات مش مؤسسة واحدة.
وأكمل: "لما نتكلم عن مصر بيكون قصدنا محمد صلاح وصالح سليم والشاذلي والفناجيلي ومسعد نور وحسن شحاتة وفاروق جعفر والخطيب بيبقى فنانين النهاردة وبيبقى أم كلثوم وعبد الوهاب وعبد الحليم لسه مصر بلد الأهرام ومحمد على وسعد زغلول زى ما هيه بلد السيسي وكل رجالة وستات النهاردة".
واستطرد: "مصر على مدى التاريخ طلعت ونزلت، بس طلعت ونزلت في إيه؟ في اقتصاد ممكن، في ضعف التعليم، احتمال، في انعدام خدمات، برضه ممكن، بس في أحلك الظروف كان فيه رموز الكل احترمها".
ووجه الشكر للدكتور أسامة الأزهرى، المستشار الديني للرئيس عبدالفتاح السيسي خلال خطبة الجمعة اليوم، معقبًا:" بشكره لأنه اللى كفانى كلام كثير عشان أقول معنى وصل له في جملة قصيرة: قوة المصري تأبى على الاختراق ضد من يتلاعبون بوعيه".
وأضاف:"هو الناس لما بتعجب ببلد وبتشاور عليه وتقول دة بلد محترم بيبقى عشان حاجة واحدة وللا عشان مجموعة حاجات إن ما كانش كل حاجة؟. .صعب تشاور على بلد أو شعب عشان حاجة واحدة، وصعب تعجبك بلد وأنت مش عاجبك شعبها لأنه في النهاية الشعب اللى عمل الحاجات الحلوة في البلد أو عمل الحاجات الوحشة.. هتلاقي نفسك وأنت بتتكلم عن بلد محترمة بتقول شفت الألمان؟ شفت اليابان؟ شفت سنغافورة؟".
يذكر أن مقدمة الإعلامي أسامة كمال في حلقة الأمس من برنامجه "مساء DMC" تصدرت محور اهتمام عدد كبير من مختلف نشطاء مواقع التواصل الاجتماعي، والتي انتقد خلالها اتحاد الكرة بسبب الأزمة المتعلقة بمباراة الأهلي وبيراميدز في كأس مصر، قائلًا: "لما إحنا قبلنا الاستثمار الأجنبي في الكورة هو كان شرط المستثمر إنه لازم ياخد الدوري؟".
تابعوا أخبار بلدنا اليوم على Google News
