”مينفعش أروح دار اتعذب فيه”.. قصة عجوز يرفض ”الحياة الكريمة”

"أنا كده مرتاح.. ومش محتاج حاجة من حد..أنا ببيع المناديل ومبخدش حاجة من حد .. ومينفعش أروح دار اتعذب فيه، وأكون عالة عليهم".. مبررات يتلفظها رجل مسن، يسكن الشارع، ويرفض المساعدة من المواطنين، ويفضل النوم في الشارع عن النوم في منزل أو مسكن أو دور رعاية اجتماعية يأويه من برد الشتاء.

أبو حسين، يجلس على كرسي متحرك، بشارع أحمد حلمي، أثناء توجه محررة "بلدنا اليوم" إليه، لتقديم المساعدة له بالاتصال بالخط الساخن بوزارة التضامن الاجتماعي، وإنقاذه من السقيع، رفض قائلاً:" أنا كده كويس، ومش محتاج حاجة من حد، ومعايا بطاطين بتدفيني، وبكسب من عرق جبيني".

"أنا بنام في الوقت اللي يريحيني، ومبضايقش حد في المنطقة، وبنام طول الليل، وكل أسبوع بستحمي في الجامع، يعني مبضايقش حد"، بتلك الكلمات علل العجوز سبب رفضه للذهاب بدور الرعاية الاجتماعية، والاتصال بفرق الإنقاذ.

كما أكد الجيران أن العجوز رفض مرات كثيرة تقديم المساعدة له، قائلين: "كل لما نقوله هنكلمك ناس تساعدك، يرفض ويقول سيبوني في حالي أنا مخدتش منكم حاجة، أنا مرتاح كده، مش عايز حد يربطني بالنوم".