1_مقدار الشوربة لمحشي الكرنب تكون الشوربة مغطية كل طبقات المحشي ماعدا الطبقه الأخيرة بس
2_مقدار الشوربه لمحشي البدنجان تكون الشوربه واصله لتلتين البتنجانة بس
3_مقدار الشوربه لمحشي الفلفل او الكوسه تكون الشوربه واصلة لنص الكوسة بس.
4_محشي ورق العنب لو خايفة يفك منك بتحط عليه طبق عشان الرز ميخرجش منه
5_تسويه المحاشي عامة إحنا بنسوي الرز مش الخضار
يعني لو محشى باذنجان بتاخدي واحده تفتحها لو الرز استوا يبقا تمام تطفي النار متستنيش جلد الباذنجان نفسه يستوي لأن الرز هيكون عجن منك ودة في حاله لو الباذنجان مش طازج ومركون بقاله كام يوم
6_المحشي بنسيبه علي نار عاليه وبعد كدا بنهدي النار تسويته زي الرز بالظبط مع مراعاه أن المحشي بياخد وقت أطول حسب كل نوع
7_التلاته كيلو باذنجان ونص فلفل بياخدو كيلو رز مصري عشان ميبقاش مليان
المحشي لو مليان رز جامد مش هيستوي
8_خضرة المحشي بتكون شبت وبقدونس وكسبره
9_توابل المحشي ملح فلفل كمون كسبره شطه
10_بنضيف معلقه صلصه عشان بتعزز اللون ومعلقه صغيره من السكر عشان الحموضه
11_تخديعه المحشي ممكن ببصل أو توم أو الاتنين مع بعض
بحب اوي بعد ما الصلصة تتسبك انزل بالرز واشوحه فيها لمده خمس دقائق على نار عاليه وبعدين أطفئ واضيف الخلطه دي توم مدقوق في الهون مع قرن فلفل حامي وكمون وكسبر وقطعه زبده بلدي كبيره كل الحجات هتسخن من حراره الرز والزبده تسيح والتوم والكمون يسخنو وريحتهم هتكون خرافيه
لما بحب أنوع ببشر بصلايه وأدعكها بملح وفلفل وأضيفها
الطعم بيبقي خرافة .
تابعوا أخبار بلدنا اليوم على Google News
