أعلنت اللجنة الفنية للساق الواحدة باللجنة البارالمبية المصرية تعاقدها مع التركي إيڤران أويانيك مديرًا فنيًا جديدًا لمنتخب مصر في سابقة تحدث للمرة الأولى في تاريخ المنتخبات البارالمبية المصرية في مختلف اللعبات.
وكانت اللجنة قد إرتأت تعيين إيڤران لرفع المستوى الفني لمنتخب مصر للساق الواحدة قبل خوض منافسات بطولة إفريقيا للمنتخبات والتي تُقام أواخر العام الجاري، وذلك من أجل تحقيق حلم الفوز باللقب القاري والتأهل لبطولة كأس العالم.
منتخب مصر للساق الواحدة
ويُعد إيڤران واحدًا من كبار مدربي الدوري التركي أحد أقوى خمس دوريات لكرة القدم للساق الواحدة في العالم، ونجح المدير الفني الجديد لمنتخب مصر في التتويج ببطولة الدورى التركى مرتين، كما حقق المركز الثالث والميدالية البرونزية في بطولة كأس تركيا ثلاث مرات ومثلها في بطولة كأس السوبر التركي.
وسريعًا أعلن إيڤران عن القائمة المبدئية لمنتخب مصر والتي شملت 30 لاعبًا ما بين 5 حراس مرمى و25 لاعبًا في المراكز المختلفة، ليبدأ معسكر الإعداد الأول والذي يستمر لمدة شهر استعدادًا لبطولة إفريقيا للمنتخبات والتي تستضيفها مصر.
سيف سلامة في معسكر منتخب مصر
وجاء سيف محمد محمود سلامة "سيف سلامة" أكبر اللاعبين سنًا وقائد منتخب مصر وواحد من الذين حملوا فكرة كرة القدم للساق الواحدة على أعناقهم على مدار سنوات مع آخرين على رأس تلك القائمة.
وسيف سلامة لمن لا يعرفه، هو بمثابة الأب الروحي للاعبي كرة القدم للساق الواحدة، وهو قائد نادي بيراميدز بطل أول نسخة لبطولة الدوري المصري، وقائد منتخب مصر في بطولة كأس أمم إفريقيا بتنزانيا 2021، وأفضل حارس مرمى في نفس البطولة، ومن هنا كان لبلدنا اليوم معه هذا الحوار.
منتخب مصر للساق الواحدة في بطولة إفريقيا 2021
- ما هو انطباعك عن أول يوم في معسكر الإعداد لبطولة إفريقيا؟.
- انطباع مختلف شوية لإنه بالنسبة ليا مسئولية كبيرة، لإني بوصفي قائد للفريق ومن مؤسسين اللعبة، بيبقى عندي عدة مهمات، لكن ممكن أقولك إن فيه سعادة كبيرة شوفتها على وجوه كل أعضاء القائمة خصوصًا الجدد، لإن خطوة زي دي مكانتش هتحصل غير بإقامة بطولة الدوري.
- المشاركة السابقة في تنزانيا، مكانش عندنا نفس العدد ده من اللاعبين، كنا بنعاني من عدم وجود دكة بدلاء قوية، لكن المرة دي مختلفة، وما شاء الله البطولة أفرزت لاعبين جدد كثر هينضموا لينا وهيدعمونا.
- نفس الفرحة دي كانت على وشي في المرة اللي فاتت، بعد ما تحقق حلم منتخب مصر لكرة القدم للساق الواحدة، وأحلامنا بتاعت زمان بقت واقع، عشان كده اجتمعت مع اللاعبين القدامى وطالبتهم بدعم ومساندة كل اللاعبين الجدد في بداية مشوارهم مع المنتخب.
- ما هو رأيك كواحد من مؤسسي اللعبة بخصوص إقامة المعسكر؟.
- كنا محتاجين نبدأ بدري شوية عشان منافسينا سبقونا، مثال على ده منتخب المغرب اللي بدأ من شهر تقريبًا، واللي دائمًا المسئولين هناك بيحاولوا يطوروا اللعبة، خصوصًا بعد ما قدموا مستويات قوية جدًا في المشاركة السابقة في تنزانيا.
- لكن الأهم إننا بدأنا، بداية قوية بالتعاقد مع المدرب التركي إيڤران أويانيك، وده تم بمساعدة أعضاء اللجنة الفنية محمد عادل حسنى وسارة سمير ومهندس خالد عبد الحفيظ واللجنة البارالمبية ووزارة الشباب والرياضة، اللي دعموا فكرة التعاقد مع مدير فني أجنبي من المدرسة التركية أفضل وأقدم المدارس الكروية للساق الواحدة في العالم، واللي عندهم عدد كبير من أفضل لاعبي العالم في اللعبة.
- ما هو رأيك في التعاقد مع مستر إيڤران؟.
- كل اللي أقدر أقوله في الجزئية دي، أنا قولته من زمان، إحنا جايين نغير وجهة النظر في الألعاب البارالمبية، وده مش مجرد كلام، والدليل إننا أول منتخب بارالمبي مصري يقوم بخطوة التعاقد مع مدير فنى أجنبى.
منتخب مصر للساق الواحدة
- ما هو تعليقك على إعلان قائمة منتخب مصر وتواجدك فيها؟.
- طبعًا شرف ليا إني أكون متواجد في قائمة منتخب مصر، وفي معسكر الاستعداد لبطولة إفريقيا، لكن القصة بالنسبة ليا مختلفة شوية، أنا في أول مشاركة رجعت بجائزة أحسن حارس مرمى في إفريقيا، وكنت من الأسباب الرئيسية إننا نقدم بطولة قوية ونلعب مباراة للتاريخ أمام منتخب أنجولا بطل العالم في الدور ربع النهائي اللي انتهى بخسارتنا بركلات الترجيح.
- عشان كده بقولك القصة مختلفة بالنسبة ليا، عشان أنا فوق كل اللي مطلوب مني كقائد للمنتخب، مطلوب مني الاستمرار على نفس الأداء وتقديم نفس المستوى ويمكن أكتر، والمحافظة على الجائزة وعلى شباك المنتخب وقيادته نحو التتويج باللقب خصوصًا وإن البطولة على أرضنا.
سيف سلامة قائد بيراميدز بطل الدوري
أخيرًا.. كيف رأيت تتويج بيراميدز بالنسخة الأولى من بطولة الدوري؟.
- تحقيق لقب أول بطولة لها مذاق خاص، لما روحنا تنزانيا وشوفنا الفروقات وعرفنا إن الاحتكاك بيعلي المستويات وبيعمل تنافسية، فكان أول هدف بالنسبة ليا هو إننا لازم ننظم بطولة الدوري بأي شكل.
- تخيل إننا روحنا بطولة إفريقيا في تنزانيا وإنت ملعبتش ماتش دولي ودي واحد ولا ماتش محلي حتى، وبالتالي واجهنا صعوبات كبيرة وعانينا ورغم كده عملنا ماتشات قوية جدًا، فكان لابد إننا نعمل بطولة للدوري عشان الناس تاخد خبرة الاحتكاك وتشوف المنافسات عاملة إزاي، وده اللي كان ينقصنا في التجربة الأولى في تنزانيا.
- طبعًا كقائد لفريق بيراميدز سعيد جدًا بتحقيق أول لقب لبطولة الدوري المصري لكرة القدم للساق الواحدة في تاريخ مصر، اتعلمنا طول عمرنا إن الكرة مكسب وخسارة، لكن إحنا مش بنرضى غير بالمكسب بس، التعادل بالنسبة لينا خسارة، كرة القدم متعرفش غير الأرقام.
- كان عندنا هدف إننا لازم نكسب أول بطولة دوري وبالعلامة الكاملة، لإنهم زي ما بيقولوا إحنا منتخب مصر، 90 % من قوام المنتخب من لاعبي نادي بيراميدز، عشان كده بالاتفاق مع كابتن محمد رستم المدير الفني واللي بالمناسبة تم اختياره لتولي منصب المدرب العام لمستر إيڤران في منتخب مصر، وضعنا خطة ونظام مشينا عليهم لحد مت حققنا اللقب، إحنا محظوظين بتواجد كابتن رستم معانا في النادي والمنتخب.
تابعوا أخبار بلدنا اليوم على Google News
