عبر المخرج كريم العدل، عن غضبه الشديد من بعض شركات إنتاج الأعمال الفنية والمخرجين؛ بسبب وصول بعض أوردرات تصوير الأعمال لأكثر من 14 ساعة في اليوم.
ونشر كريم العدل، عبر صفحته الشخصية بموقع التواصل الاجتماعي فيسبوك رسالة يهاجم فيها المنتجين والمخرجين قائلًا: "أنا ومخرجين كتير غيري، بنحارب طول الوقت على فكرة اننا مش هنصور اكتر من ١٤ ساعة في اليوم -اللي هو اصلا كتير على فكرة- غير في الضرورة القصوى… و فجأة نتفاجئ بأوردر تصوير بيبدأ الساعة ٤ فجر الجمعة.. و بيخلص الساعة ١٠ صباحا يوم الحد؟!! ٥٤ ساعة؟؟!!!! والمفاجأة بقى انه ((فيلم)) كمان مش مسلسل مثلا، فمش مضغوطين علشان يسلموا الحلقات في رمضان ولا اى حاجة -رغم ان برضه المبدأ مرفوض تماما بس يجوز تفهمه".
وأضاف "العدل": "فيعني ايه؟ و ازاي؟ و ليه الناس موافقة؟ و مين اللي إدى الحق للمنتج او المخرج انهم يعملوا اوردر ٥٤ ساعة؟؟ و يعني ايه ممثل يقف قدام الكاميرا و هو بقاله فوق ال٤٨ ساعة مابينامش؟؟ يعني ايه كرو إضاءة و پانثر يبقوا بيشيلوا معدات و يحطوا و ينزلوا و يطلعوا لمدة تفوق ال٤٨ ساعة؟؟ طيب فين النقابة؟؟ وهل السوق ده بقى ماشي بالسخرة؟؟ هل الكرو تحول الى عبيد بالنسبة ليكم؟؟!! طيب هل المنتج هيدفع أجر الناس يومين و نص ولا ٣ أيام ولا هيدفع بزيادة علشان يعوضهم؟؟! ". 
كريم العدل
وتابع: "طيب لو المخرج -اللي أنا شخصيا أول مرة أسمع إسمه- مش خايف على نفسه ولا على شغله ولا على صحته، احنا ذنبنا ايه؟ هو مش فاهم إنه بيضر السوق كله؟؟ وإن غالبا بعد شوية ده بيتحول للعادي، وإن طالما حصلت مرة يبقى ليه ماتحصلش تاني؟؟ مش فاهم إن عنده زملا بيحاربوا في كل مشروع سواء فيلم أو مسلسل علشان مايحصلش في الكرو بتاعهم كده؟؟!!! ".
وأنهىى كريم العدل رسالته قائلًا: "عامةً أنا أول مرة أسمع اسم المخرج، وأول مرة أسمع اسم شركة الإنتاج.. و مع كامل احترامي ليهم أحب أقول ليهم حرام عليكم وعيب.. وأحب أقول للصناع و الكرو و الناس اللي ورا الكاميرا من فضلكم ماتسكتوش يا جماعة.. ده مش عادي ولا طبيعي!! كفاية عبث في الشغلانة… العبث اللي فيها مكفيها والله".
جدير بالذكر أن آخر أعمال كريم العدل مسلسل "أزمنة منتصف العمر"، ويشارك فيه عدد كبير من الفنانين أبرزهم: ريهام عبد الغفور، كريم فهمي، رشدي الشامي، ركين سعد، رنا رئيس، عمر السعيد، وعدد آخر من الفنانين، والمسلسل من تأليف أحمد عادل ومعالجة درامية لـ كريم فهمي وكريم العدل.
تابعوا أخبار بلدنا اليوم على Google News
