محامٍ بالنقض: أتعابي في أزمة شيرين عبد الوهاب إنهم هيعملوا لي تريند! (فيديو)

كشف مصطفى محمود قطب، المحامي بالنقض، دهاليز وسراديب خروج الفنانة شيرين عبد الوهاب من المستشفى، معربا عن أسفه الشديد أن تكون أتعابه على مجهوداته هي الوعد بأنهم "هيعملوا له تريند".

وحكى قطب خفايا خروج شيرين عبد الوهاب، خلال مداخلة هاتفية لبرنامج "آخر النهار"، تقديم الإعلامي تامر أمين المذاع على قناة "النهار"، بقوله: "كلمني حسام الشيخ صديق الفنان حسام حبيب طلب مني إننا نخرج الفنانة شيرين عبدالوهاب لأني الأستاذ ياسر قنطوش كان عندها العصر نفس اليوم وتعنتوا وقالوا إنها لسه محتاجة تقعد فترة في المستشفى".

وأضاف: "خدت أستاذ حسام الشيخ وروحنا المستشفى وقابلت هناك دكتورين وأشخاص من الأمن والإدارة وبعد مفاوضات معاهم قالوا لنا ما عندناش مشكلة خالص احنا بنتصل بالأستاذ ياسر ومبيردش علينا قولتلهم لو حجتكم الأستاذ ياسر هو 10 دقائق ويكون هنا".

وتابع: "خليت حسام الشيخ كلم ياسر قنطوش في التليفون وطبعا مكانش مصدقنا وقال إنه هو كان هناك العصر.. طب إذا كان كده أنا في أكتوبر هتأخر عليكم شوية استنيناه من 10 ونصف مساء وجالنا الساعة 2 ونصف صباحا وقال لنا طبعا وهو جاي في السكة إني فيه حاجة غريبة حصلت إن الفنانة أول مرة تتصل بيه وقالت له يا أستاذ ياسر بعد إذنك أنا تعبانة النهارده خليها بكرة ما تجيش.. فقال لنا يا جماعة أنا جاي ومصمم إننا ناخدها لأن فيه حاجة غريبة بتحصل".

وواصل قطب: "لما جه ياسر قنطوش الساعة 2 ونصف بعد منتصف الليل تواصلنا مع المستشفى لما جينا ندخل بسبب الشد والجذب اللي أنا عملته معاهم مرديوش يدخلوني معاه مكملش 10 دقائق داخل المستشفى وخرج قالنا إني المستشفى معندهاش مشكلة بالنسبة للخروج بس الفنانة قالت لي أنا تعبانة انهارده والوقت متأخر فهخرج بكرة معاك فهنيجي بكرة ناخدها الساعة واحدة ونصف".

واستطرد: " طبعا أنا الكلام ما عجبنيش قلت له يعني إحنا مستنيينك 6 ساعات في الشارع وما صدقنا الفنانة خارجة هي اللي هتقول لك بكرة؟! الكلام ده مش مظبوط، بعد إذنك تعالى نعمل محاولة. في الوقت ده كلمه حسام حبيب في التليفون وطلب منه إنه يعمل محاولة تاني ويدخل معايا. دخلنا تاني ما عملش أي محاولات".

واختتم: "تاني يوم عشان نتوجه للمستشفى وأكمل دوري وشغلي روحت متوجه للمستشفى، فعرفت إنهم خدوها الساعة 10 ونصف قبل ما أروح".

وأعرب مصطفى محمود قطب، المحامي بالنقض، عن خيبة أمله بقوله "أكتر حاجة ضايقتني إني مفيش تقدير أدبي واتفقت على أتعاب، وأول حاجة لما كلموني قالوا لي إحنا هنعمل لك تريند النهارده.. والكافيه كله كاميرات والمستشفى فيها كاميرات تثبت وجودي".