بسمة للميس الحديدي: وزني زاد في عشر سنوات 10 كيلو

شكلي أتغير أكيد في عشر سنوات وشكلنا بالمكياج مختلف عن غيره والناس بتعرفني في الأماكن العامة من صوتي ويشبهوا عليا.

وزني زاد في عشر سنوات 10 كيلو وأحرص على إتباع نظام غذائي لو وصلت لحد معين لكن مش بعرف أمارس الرياضة وبحب العجل والمشي.

بيجيلي تعليقات سلبية على السوشيال ميديا وخير رد عليا الصمت والتدخل في حياتي الشخصية وشكلي وملابسي مزعج.

لا أخف من التقدم في العمر فهو فصل جديد من الحياة لكن مايخفيني الاعتماد على الغير أو المرض، ولست ضد عمليات التجميل المهم أن يكون الشخص راضي عن نفسه.

كشفت الفنانة بسمة أن الكثرين يعرفونها من صوتها قبل ملامحها قائلة: مش سر إحنا شكلنا بالمكياج مختلف عن بدونه وكتير بدخل أماكن عامة الناس بتشبه علينا وتقول شبه بسمة وعشان كده بيعرفوني من صوتي.

وحول تغير اللوك في مسلسل طير بينا يا قلبي تابعت في لقاء خلال برنامج كلمة أخيرة الذي تقدمه الإعلامية لميس الحديدي على شاشة ON:"شكلنا بيتغير أكيد من عشر سنوات فاتت وكمان الشعر ولما بنقف في المراية بلاقي الشكل متغير أما سيكولوجيا أو مادياً أو ملموس سواء أوجاعنا بتظهر على وشنا أو تجاربنا وده طبيعي شكلنا يتغير.

وحول عمليات التجميل ورغبتها في تغيير شكلها قالت: فيه حاجات في شكلي عمري ما كنت راضية عنها زي سناني لأنها حادة ومعوجة وممكن تعور وأنا باكل و وحاولت أعمل شيء تجميلي فيها لكن لم أكمل في نصف الطريق وقلت ليه أغيرها دلوقتي ماأكيد وانا كبيرة ممكن تقع هركب طقم سنان .

وعن حبها لتناول الطعام رغم رشاقتها قالت: من ضمن التغيرات في الشكل وزني زادة 10 كيلو جرام خلال عشر سنوات وده غير في شكلي برضه لكن بحاول أحافظ على حد معين لا يمكن تجاوزه لما وقف على الميزان وبضطر اقفل بقي أربعة أشهر مثلاً عشان أخسر ما زاد من وزني خاصة أن جزء من شغلي وعملي هو الشكل ولازم أحافظ عليه برضه خاصة أن طبيعة شغلنا بنخلص تصويرنا في وقت متأخر ويمكن يلخبط مواعيد الطعام وممكن يلخبط الوزن.

وحول ممارستها للرياضة قالت: مش بعرف أمارس الرياضة غير المشي والعجل مش بعرف أعمل زي الفنانات إلى بيصوروا نفسهم في الجيم وبيمارسوا الرياضة وبقلهم ربنا معاكم.

ورداً على سؤال الحديدي: هل تخافي من التقدم في العمر ؟ أجابت قائلة: "مش بخاف من السن كتقدم في العمر وما هو يصاحبه من علامات لاني بعتبرها فصل جديد في الحياة لكن أخاف من السن أني أكون معتمدة على حد غيري مهما كان هو مين والأفكار المرتبطة بالمرض لكن لا يقلقني وجود خط حول الشفاه أو خطوط حول العين مع تقدم السن صحيح ممكن نحاربه وده طبيعي لكن برضه كل خط من هذه الخطوط تعكس تكشيرة أو ابتسامة ليها ذكرى معايا في يوم من الأيام لكن في النهاية لست ضد عمليات التجميل المهم أن يكون الشخص راضي عن نفسه.

وانتقدت بسمة، تعامل السوشيال ميديا مع تقدم السن بين الرجال والنساء قائلة: فيه ناس لما بتشوف الرجالة شعرهم أبيض بيقولوا وقار ولكن الست شعرها أبيض يبقى خلاص عجزت وانتهت.

ولفتت إلى أنها تتلقى تعليقات مزعجة على التواصل الاجتماعي قائلة: كتير شفت ده ولكن أكثر ما يضايقني التعليقات المتعلقة بحياتي الشخصية وبرفضها وبعضها يتحدث عن شكلي وأفكاري ولبسي لكن بحب الرد عليهم بالصمت لأن الناس دي عايزة تستفزك عشان تتحول لخناقة ثم تريند وده مابحبوش.