تصريحات نارية للفنانة نشوى مصطفى

كشفت الفنانة نشوى مصطفى، لـ شعبي اف ام، من خلال مداخلة هاتفية لبرنامج" زق عجلك" مع تامر جابر وشيماء السباعي.

وقالت نشوى مصطفى: "فيه حاجات كتير حلوة في الحياة نستاهل نحمد ربنا عليها".

وتابعت:" عيني وراسي لكل صديق عنده مشكلة مرة وإتنين وثلاثة، لكن لو الشكاوى بقت أسلوب حياة وحسيت إنه شكَّاي.. ببعد عن، ولو ليا صديق عزيز وبقى من الناس الشكاية بقول له: "هو الدنيا مافيهاش حاجة حلوة ولا إيه؟".

واستكملت:" في شخص شكاي واتكررت منه الشكاوى في كذا موقف باستمرار، أنا عندي الجرأة أني أقول للشخص ده "كفاية"، لأن فيه فرق كبير بين الفضفضة وإن يكون أسلوب حياتك هو الشكوي المستمرة بسبب وبدون سبب".

وأضافت:" ربنا سبحانه وتعالي نفخ فينا من روحه، المفروض علينا نحمده إن الدنيا فيها حاجات كتير نشكر ربنا عليها.. زي الصحة اللي تكفيني إني أقوم أخدم نفسي.. الحياة فيها سلب وإيجاب، ومن خلال الإيجاب في حياتي ببعد عن السلبيات".

وأفادت: "قال نبينا عليه أفضل الصلاة والسلام، تبسمك في وجه أخيك صدقة، وأعتقد إن أي بني آدم لو حطّ في عقله، إن بث السموم والشكوى والعبوس هناخد عليها سيئات، الناس هتبطل السلبية في حياتها".

وأشارت:" أقول لكل شخص كثير الشكوي "فتح عينك وهتلاقي في حياتك حاجات كتير حلوة، تحمد ربنا عليها".

واختتمت:" في مرة من المرات، شعرت باكتئاب، لأني ممثلة شاطرة، ولكن مفيش قدامي أعمال، وأنا بجتهد وبعمل اللي عليا، وطبعا الشغل ده كله أرزاق، فدايما بخبط علي باب ربنا.. وحتي لما صرحت وقولت "أنا بشتغل ممثلة وبيقولوا ييجي مني" قولتها بأداء كوميدي.. أنا عاوزة أمثل بقي".