الفنان كمال أبو راية لشعبي أف أم: الأدوار التاريخية هي اللي بتناديلي وأنا كوميدي جدا برة الكاميرا

قال الفنان كمال ابو راية ان الادوار التاريخية هى اللى بتحبنى بمعنى انا اللى بتطلب ليها و انا بستمتع بادائها مفيش عمل انا اللى اخترته هما بيشوفوا ان انا مناسب للشخصية فبيختارونى، و ورا الكاميرا انا مش دمى خفيف بس لا انا فوضوى و كسلان و حاجات كتير، جاء ذلك خلال مداخلة هاتفية لبرنامج اللمة تحلى على شعبى اف ام والحلقة من تقديم شيماء السباعي.

وأضاف عملت حاجات كوميدى زى عفاريت عدلى علام اتصنف لايت كوميدى، مأمون وشركاه كوميديا موقف و فيه حاجات تانية كتير و ممكن اكمل كوميدى بس للاسف الكتابة الكوميديا صعبة اصعب من الكتابة التقليدية.

وتابع الكوميديا الراقية هى الشخصية اللى تعمل افعال جادة ينتج عنها ضحك هى ديه الكوميديا الحقيقية اللى اتعلمناها فى المعهد زى اللى بيعملها عادل امام ديه كوميديا حقيقية.

وعن الفنان أحمد عبد العزيز فقال أنا و احمد عبد العزيز لينا ذكريات كتير مع بعض فى سوق العصر كان بيفرهدنى احمد بيشتغل بجد اوى بيروح الاستوديو بيبقى واحد تانى خالص، وجالنا اعلان كنا هنعمل فيه مشهد من سوق العصر و مكنش عندنا مانع نعمل الاعلان طالما مش هيهدر من قيمة المشهد الحقيقى و ميبقاش تريقة عليه او هزار او يقلل من قيمته و يستاذنه شركة الانتاج و اننا ناخد فلوس كتير ديه كانت الشروط بتاعتنا لكن متوفقناش و بصراحة مكناش متحمسين اووى.

وعلق ان الحب سر السعادة وان الواحد يحب اللى حواليه و الناس اللى حواليه تحبه، ولو هتجوز شخصية تاريخية اتجوز نفرتيتى كانت شخصية مهمة جدا.

واختتم قائلا مفيش حاجة مش حابب اعملها لان الحاجة اللى مكنتش موفق فيها اوى كان ليا عذرى انا اشتغلت حوالى 100 مسلسل فلو منهم تلاتة فى الـ100؜ اعمالها فى راضى عنها فالحمد لله، وشعبي اف ام محطة جميلة بسمعها كتير لانها اذاعة مصرية بتعبر عن نبض الشارع المصرى بشكل صادق و حقيقى و كل سنة وانتوا طيبين.