قال الفنان أحمد سعد، إنه كان مهتما بزوجته علياء بسيوني قبل ان يتقدم لخطبتها، موضحًا: "كنت حريص على إني أعبر عن حبي بالتصرفات، وحبتها أول ما شفتها وهي مختلفة جدا عني وعن أسلوب حياتي في كل حاجة".
وأضاف سعد، خلال حواره مع الإعلامية بسمة وهبة مقدمة برنامج "90 دقيقة"، الذي يعرض عبر شاشة "المحور"، أن زوجته شخص مرتب ومنظم بعكس نمط الذي يتبعه دائما، إذ تسيطر العشوائية عليه: "بتحب أصحابها وبتحب تضيف لكل الناس، ودي أول حاجة كانت بتعملها معايا".
وتابع: "ذوقها حلو جدا في اللبس، وكل أصحابها بيسألوها عن لبسهم، وهي ديكتاتورية فوق الوصف في اللبس والذوق، واختارت لي كل الحاجات اللي في دولاب".
وحول أكثر ما أثار إعجابها في أحمد سعد، قالت علياء بسيوني: "لذيذ وأنا بتبسط من الناس اللي بيبقى ليها شخصية في القعدة وعنده كاريزما ويدخل في أي حتة نحس بيه، لكنه كان شبههي في إنه مزاجي وبنحب التحديات، كان يظهر ويختفي، فكان الاختفاء بيستفزني".
واوضحت: "أول ما عرفته واختفى، قدرت أعرف المكان اللي كان هيغني فيه، فاستعنت بواحدة صحبتي بتحبه"، ليرد عليها قائلًا: "كنت بغني وببص على الناس ولاقتها قدامي، وانا بحب الحاجات المفاجآت".
وواصلت زوجته: "لما شافني قررت أمشي، ساب المايك ويقولي انتي رايحة فين؟! هتروحي بدري ليه؟! وكل ده قدام الناس، وقتها كان بيغني بحبك يا صحبي، فاتبسطت أنا".
تابعوا أخبار بلدنا اليوم على Google News
