تامر أمين يشيد بموقف حمادة هلال بعد حلاقة المداح (فيديو)

أشاد الإعلامي تامر أمين بموقف الفنان حمادة هلال من قيام ولد صغير برسم اسم مسلسل "المداح" على شعره أثناء الحلاقة.

وفي فيديو له قبل تقديم حلقة اليوم من برنامج "آخر النهار" على قناة النهار، قال تامر أمين: "المفروض إن دا نجاح فظيع للمسلسل، ومين أكتر واحد في الدنيا المفروض يتشقلب من الفرحة؟ حمادة هلال، بس الحقيقة معملش كده، وطلع أوعى وأنضج مما نظن. شاف الصورة وكتب تعليق قاله أرجوك بلاش والنبي."

وأضاف: "حمادة هلال يثبت إنه أولا ابن بلد وواعي وفاهم، والنجاح مبيلفش دماغه زي ناس تانية، وإنه عارف إن دا مسلسل اتمثل وخلاص، لكن الولاد لازم تحافظ على شخصيتها وهويتها، ومتتأثرش بالحاجات الغلط دي. برافو المداح، وبرافو حمادة هلال، وعيب أوي على الحلاق."

يذكر أن مسلسل "المداح" عرض في رمضان الماضي، وهو من بطولة حمادة هلال، أحمد بدير، نسرين طافش، خالد سرحان، محمد عز، دنيا عبد العزيز، جمال عبد الناصر، محسن منصور، عمرو رمزي وتامر شلتوت، تأليف أمين جمال، وإخراج أحمد سمير فرج.