على رأسهم هاني شاكر.. أحمد فلوكس يهاجم الفنانين بعد وفاة مصطفى حفناوي

الاثنين 10 اغسطس 2020 | 11:13 مساءً

أعرب الفنان أحمد فلوكس عن غضبه تجاه حالة الجدل التي أثارها رواد مواقع التواصل الاجتماعي، والكلمات المؤثرة التي نعوا بها اليوتيوبر الشهير مصطفى حفناوي، الذي رحل عن عالمنا اليوم.

وتحدث "فلوكس" عن الذين عبّروا عن حزنهم لوفاة "حفناوي"، وذلك عبر بث مباشر نشره عبر حسابه الشخصي على موقع التواصل الاجتماعي "فيس بوك"، وقال: "أبويا علمني مغلطش في حد كبير، وأنا معرفش مصطفى حفناوي، ولكن متابع حالته من عدة أيام، محدش زاره غير تامر حسني لأن تامر راجل، بقاله 7 أيام بيناشد عايز يتعالج، مسمعناش عن اللي كتبوا عنه في طبق اليوم، دلوقتي كله الله يرحمه، كله بما فيهم الأستاذ الفاضل الكبير هاني شاكر، اللي قال أنا معرفوش بس قلبي وجعني، طب قلبك موجعكش وهو مش لاقي مستشفى تستقبله وهو عنده جلطة في مخه؟؟".

ووجه رسالة شديدة اللهجة لكل مترحمي ذلك "اليوتيوبر"، قائلا: "اتقوا الله كفاية متاجرة بالبني آدمين، كفاية، إيه دا إيه دا، ما كان بقاله 6 أيام مش لاقي حد يعالجه أو يساعده، اللي عرف الناس القصة لما تامر حسني راح زاره، دلوقتي بقى كله فاكره، أستاذ هاني شاكر هو تامر حسني النقيب ولا أنت، اتقوا الله، انتو بتاجروا بموت بني آدم، دا شاب وصغير، الناس اللي كاتبين الله يرحمه الفنانين والفنانات والمنتجين كنتوا فين وهو يوتيوبر وكان عايز يمثل، وهو بيروح من الكرفان دا للكرفان دا وعايز يمثل، مخلتهوش يمثل ولا يبقى فنان ليه".

وأضاف: "ولا لما مات افتكرتوه، إيه دا، طيب مش انتو زعلانين عليه، أنا بطالب كل اللي كتب الله يرحمه إنه يروح يبني جامع باسمه مدام انتو رجالة أوي كدا، احنا في زمن غريب".

وأصيب مصطفى حفناوي بجلطة في المخ قبل وفاته بأيام، أسفرت عن غيبوبة انتهت بوفاته، ونعاه بعدها العديد من نجوم الفن والإعلام مصطفى حفناوي.

احمد فلوكس