"أنا اتنصب عليا فى جوازي.. أنا طبيبة.. تقدم لخطبتى شاب معروف عن أهله إنهم ناس ملتزمين وكل ستات العيلة منتقبات"، بهذه الكلمات بدأت الزوجة الثلاثينية، طبيبة، تروى أسباب طلبها الطلاق للضرر أمام محكمة الأسرة بالجيزة بعد زواج عامين من مهندس، بعد أن اكتشفت حقيقته لكن بعد فوات الأوان فقد حصل على مبالغ مالية منها وخانها مع أقرب الناس إليها.
طلبت الطلاق بعد اكتشافها أن زوجها خانها مع أكثر من سيدة حتى صديقتها، واستولى على أموالها، وأصبح مدمنًا.
قالت الزوجة أمام محكمة الأسرة: "تقدم لخطبتى شاب معروف عن أهله إنهم ناس ملتزمين وكل ستات العيلة منتقبات، الشاب دا أكبر منى بسنتين، أبوه متوفى وأمه اللى جت اتقدمت وقالت ابنى مهندس اتصالات، وعنده شركه وعنده شقه فى بيتنا.الشقه مش متشطبه قدامها سنة".
وتابعت: "الأهل اتفقو إننا نجوز فى شقه إيجار 6 شهور لما يشطب شقته اللي فى بيت ابوه، اتجوزت واكتشفت إن جوزى مدمن وبيجيب الستات فى شقتى بعد مابنزل شغلى وهو نايم طول النهار وطول الليل جايبلى فى شقتى صحابه بتوع المخدرات وسواقين التكاتك".
وتكمل: "صحابه يسهروا معاه للساعة 3 الفجر فى بيتي، وأنا برجع من عيادتى أدخل أوضتى واقفل الباب على نفسى وكنت بنام بهدومى لدرجة إنى كنت ببعتله رسالة عالموبيل عايز ادخل الحمام، ومبيرضاش يصرف على بيته ودبسنى في الايجار، واتحايل عليه ينزل شغله يقولى ممعيش فلوس افتح المكتب".
وتابعت: "كنت محوشه دهب من شغلى بقيمه 50 ألف جنيه، اقترح عليا زوجي أديهمله يبعهم ويجيب بضاعه ويفتح المكتب خد الفلوس صرفها عالمخدرات وضربنى وطردنى من البيت".
تواصل: "غضبت 7 اشهر، لحد ما اكتشفت اني حامل، وقررت ارجع ليه، بس لما رحت عرفته إنه خاني مع خالتي، ولم اعرف ماذا أفعل، فخالتي متجوزة من عمي، وستكون صدمة كبيرة له".
وأنهت الزوجة حديثها: «أنا مش مسامحة خالتي ولا أهلي لأنهم السبب، لم نسأل عن زوجى وعائلته وتزوجت من رجل لا يراعى ضميره، وأنتظر وضع ابنى الذى لا ذنب له سوى أننى تزوجت من والده، وقررت اللجوء لمحكمة الأسرة لأطلب الطلاق للضرر منه بعد أن هرب الزوج ولم أعرف له مكاناً».
تابعوا أخبار بلدنا اليوم على Google News
