بعد تسليمها لـ500 ألف مواطن.. ذوي الإعاقة: بطاقات الخدمات المتكاملة حبر على ورق

بطاقات الخدمات المتكاملة أو بطاقات ذوي الإعاقة، مصطلحات انتشرت خلال الفترة الأخيرة على مواقع التواصل الاجتماعي ووسائل الإعلام الإلكترونية وصفحات الجرائد والمجلات منذ مايقرب من 3أشهر، وأدخلت الفرحة والبهجة على مايقرب من 15 مليون معاق، واعتبرها ذوي الاحتياجات الخاصة انفراجة كبيرة أدخلتها الدولة عليهم بعد سنوات كبيرة من التهميش والإهمال، على غرار أن تلك البطاقات ستعطي لهم الحقوق والواجبات التي كفلها لهم القانون، الأمر الذي على خلاف الحقيقة، حيث خيبت تلك البطاقات أمال العديد من أصحاب ذوي الإعاقة الذين تمكنوا من الحصول على تلك البطاقات.

مآساة ذوي الإعاقة على أرض الواقع

قال حسن .م، إنه استلم كارت الخدمة المتكاملة، "ومش عارف فايدته إيه، وكمان لما بطلعه في الأتوبيسات ومترو الأنفاق، محدش بيعترف فيه".

وتابع: "أنا استلمته من مكتب البريد، ولما توجهت للموظف عشان أعرف هيشتغل ازاي وإمتى، أعطاني رقم اتصل عليه، ومر شهر ويوميا أقوم بالاتصال ولا أحد يرد علي، فلا أعرف ماالعمل، ده شكلها حبر على ورق".

معاملة سيئة من الموظفين

وقالت ن.ع:" لما لقيت اسمي نازل على موقع وزارة التضامن الاجتماعى، فرحت جدا وشكرت ربنا إن حلمنا أخيرا اتحقق، ولما رحت استلمها من المكان اللي الوزارة بعتتلي ليه، لقيت الموظف بيقولي روحي مكتب التأهيل لتصوير واستكمال البيانات".

وتابعت: " بالفعل ذهبت للمكتب وهناك لقيت معاملة وحشة أوي، وقالولي في شهر 2 تعالي، وإذا مش عجبك روحي الوزاره اشتكينا، مع العلم أنا عملت قمسيون كرامة، ولحد دلوقتي مش عارفة اعمل ايه، مش هقدر اروح الوزارة، إحنا بنطلع وننزل بالعافية".

فين حقوقنا من مسابقة وزارة التربية والتعليم

ن.ع، محافظة الجيزة، قالت: "استلمنا البطاقة ومعايا في شنطتي وكل لما بطلعها لحد يقولي مش عارفين عنها حاجة، ولما رحت المستشفي كنت بكشف على عيني، وطلعت البطاقة للسكرتيرة، برضه نفس الحكاية قالوا مش عارفين عنها حاجة، إحنا بجد تعبنا ومش عارفين هنعمل إيه".

وأكملت:" أنا خريجة خدمة اجتماعية، مش المفروض نقدم في مسابقه التربية والتعليم ٥٪، ولا أي مؤهل متوسط بدون شهادة تربوي، ومش المفروض إننا نكون لينا نصيب، والبطاقة ده تسهلنا الدنيا ولا إيه".

المدير هددها بطرد أولادها

"أنا أم وعندي 4 أولاد، استلمت بطاقات الخدمات المتكاملة، من شهرين واتصلت بالرقم عشان أحدثها زي ماقالولي، محدش رد عليا"، بتلك الكلمات قالت السيدة م.أ، مأساتها بشأن بطاقات الخدمات المتكاملة.

وتابعت: " لما سألت موظف في مكتب البريد قالي البطاقة ده ممكن متدفعيش بها مصاريف عيالك في المدرسة، وتخدي إعفاء، ولما رحت للمدير في المدرسة بالمنوفية، قالي مجتلناش تعليمات بالموضوع ده، ومنعرفش حاجة عنها، لتدفعي المصاريف لإما مش هدخل ولادك المدرسة".

وأضافت: " أنا فعلا مش عارفة أعمل إيه، كل لما طلعها لحد حتي في الاتوبيس اللي بركبه وأنا بودي الولاد المدرسة، محدش معترف بيه، اعمل بيه إيه، خدوا 40جنيه كانوا عيالي أولى بيها، حسبي الله ونعم الوكيل ".

رحت بالصدفة ولقيت اسمي في البوستة

بدوي .م، محافظة سوهاج، قال: " استلمت كارت الخدمات، واسمي مكنش نازل على موقع وزارة التضامن الاجتماعي، ولما رحت البوسطة بتشجيع المنشورات اللي كانت بتنزل على الفيس بوك، وكانت بتقول إن في ناس كتير راحت البوسطة واستلمت من غير ما اسمها موجود في الموقع".

وأكمل: " أنا استلمت بس مش عارف إجرات التفعيل، حتى الرقم اللي شوفته في الاخبار اللي نشرتها وسائل الإعلام الإلكترونية محدش بيرد عليها، ولحد دلوقتي مش عارف أعمل إيه، أنا شايلها في الدولاب عشان متضعشي منها، ومش خسرانين حاجة".

مضينا على وصلات أمانة إجباري

واستطرد، أ.س، قائلا: " هناك أشخاص قاموا بشراء سيارة من بورسعيد قبل استلام بطاقة الخدمات المتكاملة، وفي ناس قالولنا إنهم بكارنيه الخدمات المتكاملة، هيستردوا قيمة الجمرك".

وتابع: " إنهم في بورسعيد سلمونا آيصالات حمراء بقيمة الجمرك، وفي جمارك الإسكندرية لقيت ناس واخدة إيصالات أمانة بالمبلغ لحين الحصول علي البطاقة الذكية تقدم الإيصال عند المستخلص وتسترد المبلغ ناقص 3% تنمية، وفي ورقة لكل من اشتري من ببور سعيد كلنا مضينا وبصمنا عليها إجباري وأكرر اجباري، وإننا ليس لنا الحق في المطالبه بقيمة الجمرك عايزين نتكاتف جميعا لكي نحصل علي حقوقنا بدون أي مقاضاه لأي جهة".

استغاثة لوزيرة التضامن الاجتماعي

بينما وجه م.غ، رسالة لوزيرة التضامن الاجتماعي، قائلا:" أصدرتم بطاقة إثبات الإعاقه ودفعتم بها إلى البريد الرئيسى الذى بدوره وزعها على المكاتب الفرعية الذي بدوره وزع بطاقة الشرق للغرب وبطاقة الغرب للشرق والمعاقين دايخين بين مكاتب البريد بحثا عن بطاقة إثبات الإعاقة بكراسيهم المتحركة وعكاكيزهم دايخين بين مكاتب البريد بتكلفة مواصلات خاصة وإرهاق ما بعده أرهاق".

وتابع: " البريد يوصل بطاقة إثبات الإعاقه لصاحبها على عنوانه ويتم تحصيل مبلغ ال 40 جنيه عند الاستلام، ياريت ترحمونا يرحمكم الله أنا شلل أطفال وكاشف وحاصل على خمس مرات سيارات مجهزة، من الإسماعيلية، ودايخ بين مكاتب البريد فى الإسماعيلية بقالى شهرين ممكن تدلوني على بطاقة إثبات الأعاقة فى انه مكتب بريد فى انتظار حل مشكلتي".