عمرو سلامة يعتذر لـ أبلة فاهيتا

نشر المخرج عمرو سلامة، على موقع التواصل الاجتماعي فيسبوك، فيديو لمشهد محذوف من فيلم "لا مؤاخذه"، وعلق قائلا: "ده كان مشهد محذوف من فيلم "لامؤاخذة"، مشهد كنت بحبه جدا، لكن في كل المشاهدات في المونتاج، كنت كل ما بفرج الناس على الفيلم كانوا يا إما بيستغربوا المشهد جدا أو مش بيفهموه، واعتقد أنها كانت نكتة معقدة برا ستايل الفيلم".

وتابع عمرو قائلا: "النكتة كانت ان في كل المسلسلات في الأفلام بعد موت احد الشخصيات لازم المخرج يقطع على قرآن وعزا وبالذات آية "يا أيتها النفس المطمئنة"، وبما إن الشخصيات في الفيلم مسيحية فلما بيحصل كده بيخرج الراوي ويعتذر ويقول إن ده من فيلم ثاني، محاولة غير مضحكة تقريبا للتريقة على الكليشيه، ونقطع بعدها على عزاء في كنيسة وبما إني كنت من المعجبين وقتها بأبلة فاهيتا وكان نفسي احطها في الفيلم في اي حاجة، فطلبتها كضيفة شرف وحطيتها في المشهد ده فبقت نكتة فوق نكتة".

وأضاف عمرو سلامة: "وكان قرار صعب اني اقتل طفلي -كما يقول المصطلح الأجنبي - واشيل المشهد خاصة أني كنت اخترت لبسا جميلا للأبلة وخايف تزعل ولكني استغل الفرصة هنا بعد مرور ست سنين علشان اشكرها واعتذرلها ثاني انها جت وعملت المشهد وأنا اضطريت أشيله".