هل لمدرب الأهلي علاقة؟.. رد ناري من أحمد السعدني على الانتقادات

انتقد الفنان أحمد السعدني، الإساءات التي وجهت له من بعض متابعيه، بسبب ما كتبه عقب وفاة طليقته وأم ولديه، أمل سليمان.

وقال السعدني عبر صفحته الشخصية على موصع التواصل الاجتماعي "فيسبوك": "طول عمري مبيفرقش معايا كلام الناس وكنت بلوم صحابي زي أحمد فهمي مثلاً إنه بيقعد يشتم الناس اللي بتشتمه وأقوله أنت بتقرا ليه أصلاً كبر دماغك.. عمري ما اهتميت اقرأ التعليقات السلبية أو يمكن كنت محظوظ إني مكنتش بشوفها أو يمكن مكنش حد بيغلط فيا".

تابع: "الحقيقة معرفش الوضع كان إيه لكن بعد البوست الطويل اللي كتبته لصاحبة البوست حبيبتي وأم ولادي رحمة الله عليها ومكنتش مهتم إن حد يقراه ولا كنت عايز اعرف رأي حضراتكم فيه.. لقيت صحابي قالولي إن في ناس شتمتني، استغربت لأن اللي اتربينا عليه إنه لا شماتة في مواقف معينة.. بس مهتمتش برضه لأن اللي فيا مكفيني أساساً".

أضاف: "النهاردة بالصدفة كنت داخل اكتب تعليق علي مدرب الأهلي الجديد بحاول اكسر حالة الجمود اللي أنا فيها والحمد لله فشلت فشل ذريع إني اكسرها والفضل لناس المفروض إنهم متابعين ليا المفروض برضه إنهم بيحبوني يعني أومال متابعني ليه عشان يشتموني؟؟.. كلام البعض واللي اعتقد مخدش منهم ٥ ثواني كتابه لكن الأكيد إنه خد وجع قلب وروح وخد من دمي وأعصابي اللي اتحرقوا كتير".

استكمل السعدني: "أنا لا هشتم ولا هعمل بلوك لحد ولا هقفل التعليقات أنا هرجع زي ما كنت اكتب وانزل صور لنفسي ولأي حد بيحبني وشخص محترم حتي لو اختلف معايا.. ومش عايز الهري ده ينسيني اشكر كل حد قريب مني وقف جنبي في شدتي وكل بعيد كان بيدعي للغالية بالرحمة ولينا بالصبر".

تابع: "والأهم اني اكتشفت وأنا بكتب السطر ده إني كسرت حالة الجمود فعلاً الحمد لله والبوست اللي جاي هيكون عن المدرب بس شكل حظه اداله فرصه معايا اشوفه في الماتشات.. إلى لقاء مش قريب غالباً".

الجدير بالذكر أن طليقة أحمد السعدني، أمل سليمان، قد رحلت عن عالمنا الجمعة 9 أغسطس، بعد تعرضها لسكتة قلبية داخل أحد المستشفيات، وشيعت أسرة الراحلة، جثمانها من مسجد سعاد كفافي.