نجوم مصر يقصفون جبهه ميريام فارس:"أرشيفك مش تقيل كفاية عشان تغني في مصر"

تعرضت الفنانة اللبنانية، ميريام فارس، لهجوم واسع من قبل فنانين ونجوم مصريين، بعد تصريحاتها في موازين حيث قالت: "صرت شوي ثقيلة على مصر".

وترصد لكم جريدة "بلدنا اليوم" خلال السطور التالية، هجوم الفنانين المصرين على المطربة اللبنانية ميريام فارس بعد تصريحاتها الصادمة.

وليد منصور

ونشر منظم الحفلات وليد منصور عبر صفحته الشخصية على موقع التواصل الإجتماعي "فيسبوك"، منشورا يهاجم من خلاله المطربة ميريام فارس قائلاً: "بالنسبة للفنانة الثقيلة على مصر كام كيلو يعنى بالظبط علشان أقدر أحسب تقيله بجد ولا ايه، والله العظيم عيب أنتِ كنت بتاخدي 20 ألف دولار لما كنا بنشغلك والدولار كان 7 جنيه يعني بتاخدي ما يوازي 140 ألف جنيه يعني يا دوب ثمن إيجار السماعات في حفلة من اللي بعملهم لعمرو دياب أو تامر حسني وحماقي وشيرين، يا تقيلة أنتي".

راندا البحيري

وعلى نفس النهج هاجمت الفنانة راندا البحيري ميريام فارس عبر حسابها الشخصي على موقع التواصل الاجتماعي "فيسبوك" قائلة: "هي مشفتش حفلة مصر امبارح؟ وحفلاتنا من بعد الثوره اللي اتكلمت عنها لحد النهارده سلطان الطرب چورچ وسوف غني في مصر ياني العالمي في مصر اكتر من مره واخرها كمان أيام عمر خيرت الهضبه العالمي عمرو دياب نجم الجيل تامر حسني الجميله كارول سماحه النجم اللي بجد محمد عبده في القاهرة في دار الأوبرا إنت مين يا أستاذه".

أمير طعيمة

ولم ينسى الشاعر أمير طعيمة أن يقصف جبهه الفنانة ميريام فارس عبر حسابه على موقع التواصل "فيسبوك" قائلاً: "ميريام فارس، فيه نجوم عالميين كتير غنوا في مصر بعد الثورة، وأجر الموسيقار ياني في حفلتي الأهرامات تخطي المليون دولار، معظم نجوم الصف الأول في لبنان أقاموا حفلات في مصر زي إليسا ونانسي عجرم وراغب علامة وحتى العظيمة ماجدة الرومي وقائمة طويلة، و أنا وإنتي عارفين انهم بياخدوا أجر يفوقك بمراحل وأنا و انت عارفين الأرقام والفرق الكبير بينهم و بينك".

وأضاف طعيمة: "إنتي مش تقيلة علي مصر خالص، إنتي بس أرشيفك اللي مش تقيل كفاية عشان يبقي عليكي طلب في بلد زي مصر، فالأفضل تشتغلي على نفسك وتعملي الشغل اللي يخليكي تبقى مطلوبة في مصر بدل الحجج اللي دمها تقيل دي، والله اترددت كتير قبل ما اكتب البوست ده، بس مينفعش برضه اعمل مش واخد بالي، بلاش مصر يا ميريام، ان مكانش من باب الأدب يبقى من باب الذكاء".

رامي جمال

واختتم الهجوم المطرب رامي جمال عبر حسابه الشخصي على موقع التغريدات القصيرة "تويتر" قائلاً: "الفنانة اللي بتقول انها بقت تقيله علي مصر ليا عندها فلوس بقالها سنه والله ادفعيه الأول يا تقيلة".