على خطى أبو العروسة.. غدا عيد العيلة يجمع شمل العائلات المصرية

كشف محمد طاهر صاحب الدعوة لاحتفالية عيد العيلة عبر موقع التواصل الاجتماعى "فيسبوك"، عن المكان الذى سيتم فيه تنظيمها والتي تتم لأول مرة فى مصر.

وأعلن طاهر عبر صفحة الايفنت علي فيسبوك قائلا : المفاجأة اللي وعدتكم بيها في الاول انا قصدت انه يكون اليوم من غير رسوم ووعدتكم انه يكون غير ربحي زي ما عمل عبدالحميد وعيلته في مسلسل ابو العروسة واتعرض عليا اسبونسرز وجهات لها علاقة بالسياسة يتحملوا الأمر مجانا ولكن لاغراض وأطماع اخرى انا لا اتمناها اقول لكم بكل صدق هذا العيد هو انقي عيد مصري لن يلوثه احد هو للمسلم والمسيحي ولكل الفئات العمرية لن يعكر صفونا اي مطمع او مصلحة شخصية لذلك قررت ان اتكلف جزء كبير من ماديات اليوم و ان اعلن عن مجانية اليوم.

وأكد : "المكان سيكون فى خان رضوان عند بيت السحيمي شارع المعز والارقام اللي هتستقبلك لو توهت دي 01023629324 & 01112203220 & 01122252321 ولو حابب تكون معانا فانت بتتصل علي الارقام دي 01023629324 & 01227712797 & 01122252321 وبتسجل اسمك ورقمك وعدد الافراد اللي معاك فقط دون اي رسوم وتذكر ان العدد محدود فبادر بحجز عيد العيلة انت وعيلتلك كلها حالا ولو حابب تحجز زيارات المستشفي 57357 ده اختياري بتختار اي مجموعة باي ميعاد يعجبك من 10 الصبح لـ 12 الظهر او من 12 ظهرا لـ2 ظهرا او من 2 الظهر لـ 4 العصر او من 4 العصر لـ 6 مساء.. اليوم فعليا بيبدأ معانا الساعة 10 مساء وحاول تتجمعوا علي 9:30 مساء علشان ننظم اليوم من اوله دون اي زحمه، اليوم مملوء بفقرات غنائية وشعر وDJ مع اجمل اغاني تجمعنا يا الصحبجية ومعانا تنورة وفرقة موسيقية و كلمة الشخصيات العامة.

وأشار طاهر إلى أن المكان محاط ببلالين وزينة حيث الجمال الطبيعي الخلاب والجو الرائع وهيكون فيه ناس ترسم حنة ورسومات علي ايدينا وده اختياري، يتم توزيع شيكولاته وورد وفوانيس رمضان، يتم عمل شو ولدينا مصورين لليوم باكمله داخل الربع الثقافي وفي شوارع المعز بعد انتهاء الحدث، هيكون فيه لايف هيظهر للمجتمع المصري يرصد الحدث، الناس بتجيب سحورها معاها وفيه وجبات في المكان لو حابب وبتدفع تمنها بنفسك واي مشروب بتاخده بـ 25ج شاي او كانز.

وأضاف أن الدعوة عامة لكل مصري بس خلي بالك العدد محدود وطبعا مش هاوصيك هات عيلتك اصحابك جيرانك احبابك قرايبك الناس اللي بتحب تشوفهم او يشوفوك ولو مش عندك عيلة احنا عيلتك هتعرف ناس جديدة وهتعمل علاقات جديدة هنلم شمل العيلة المصرية ومتنساش تجيب معاك مينا وجرجس او هو يجيبك ما هو عيد العيلة للكل و نصالح اللي مخاصمينهم ده السلام بالايد بيفرق و اللمة الحلوة بتجمعنا كمية السعادة و الحب في اليوم ده وهم الحلم اتحقق الحمدالله بيكم و هنعمل الخير كمان و نبدا شهر رمضان بنية صافية و حب و تصالح مع نفسنا قبل غيرنا.

جدير بالذكر أن هذه الفكره جاءت تلبيه لدعوة القائمين على مسلسل ابو العروسه بطولة الفنان سيد رجب والذى دعا من خلاله تطبيق عيد العيله واختار يوم 5/5 على ان يكون موافقا لتنفيذه كما وجه هانى كمال مؤلف المسلسل دعوة رسمية للحكومة بتخصيص يوم في السنة لجمع شمل العائلات بعيدًا عن حياة السوشيال ميديا على أن يوافق الخامس من شهر مايو.