فيديو| عن أزمة البيض.. عمرو أديب للقطاع الخاص: إذا لم تكن معايا والزمان شرم برم فلن أكون معاك والزمان ترللي

علق الإعلامي عمرو أديب، بطريقته المعهودة، على أزمة نقص البيض، بقوله "إذا لم تكن لي والزمان شرم برم فلن أكون معاك والزمان تراللالي". ولفت إلى أن مشكلة نقص البيض موجودة في بريطانيا، موضحا أن المشكلة جاءت بسبب انتشار أنفلونزا الطيور، وبالتالي الدولة أصبحت مفيهاش بيض، وده اسمه «الوضع القهري»، منتقدا أن تتحمل الدولة دائما حل الأزمات وحدها، متسائلا: "أنا باقول القطاع الخاص فين؟".

وأضاف عمرو أديب، خلال برنامجه «الحكاية»، المُذاع عبر فضائية «mbc مصر»، أن قطاعا مثل قطاع الحديد فيه جزء منه إنتاج دولة، قائلا "وأنا بتكلم بصراحة، إحنا وصلنا لمرحلة إن رئيس الوزراء خصص وقته لموضوع الثروة الداجنة في مصر، ولو سألت أي دولة رئيس الوزراء قاعد يناقش موضوع زي ده بيقول لك لا، رئيس الوزراء قاعد يشتغل على محطات التحلية، إزاي ندفع السوق المصرفية، أو قاعد في اجتماع مع محافظ البنك المركزي".

وتابع: «ليه القطاع الخاص بيعمل فينا كده؟! طيب الدولة بتفرج يوميًا على الأعلاف على قمح، ومستلزمات إنتاج يبقى الدولة أمال بتفرج عن ايه شيكولاته، لكن السلع أصبحت عملة زي الرز، وكمان العلف بقى عمله، بره يقولك أخليه وأبيعه السنة الجاية بسعر أغلى طيب القطاع الخاص فين ليه مش واقف معانا».

ووجه رسالة وجهها للقطاع الخاص بقوله "الدولة عارفة بتعمل إيه، أنا لا أتحدث عن التسعيرة الجبرية، هذا الموضوع مش هينفع في وسائل إقناع موجودة وفى حاجة تاني اذا لم تكن معايا والزمان شرم برم فلن أكون معاك والزمان تراللالي، بمعنى أنتا لو مش معايا وانا مزنوق أكيد انا هعدي من الأزمة ولو موقفتش معايا كدولة مش هبقى معاك لما أقف على رجلي".