عفاف شعيب: قلت لأحمد زكي في الحج اقرا قرآن.. قال أنا شيطان (فيديو)

قالت الفنانة عفاف شعيب إن البعض أوقعوا بيني وبين الفنان الراحل أحمد زكي، واستغلوا خلافي معه في موسم الحج.

وأضافت عفاف شعيب، خلال لقائها في برنامج واحد من الناس، تقديم الإعلامي عمرو الليثي، عبر قناة الحياة، أنها بعد أن أقنعت أحمد زكي بالحج "علشان ربنا يرضى عليه، لقيت فيه ناس وسوسوا له، وقالوا له خليك قاعد في الأوتيل، وأنا قلت له لازم تروح مِنى علشان تقرأ قرآن، قال لي طيب، وفجأة وإحنا قاعدين لقيته بيصرخ في وشي، قال لي مش رايح معاكو، قلت له إنت حر، دي مناسك لازم تلتزم بيها. أتاري فيه ناس قالوا له سيبك منها ده كلامها ما لوش لزمة، وفي نفس الوقت فيه حد قال لي إنه ما قراش قرآن في عرفة، فقلت له ليه ما قريتش قرآن؟ قال لي أنا شيطان من الشياطين، قلت له إيه الأسلوب ده؟! وقلت له اوعى تكلمني، ورحت أوضتي، وقلت خلاص مش هاكلمه، وجالي البيت من غير ما يتصل، وقال لي بصي إنت جوهرة غير كل الناس".

وكشفت عفاف شعيب عن الأيام الأخيرة في حياة أحمد زكي، بقولها: "قبل تعبه جالي البيت، وقال لي هاعمل حليم، قلت له عارفة انك بتحبه بس بلاش والنبي؛ لأني حسيت إنها نهايته، سألني ليه؟ قلت له دي نهايتك، وقلت له اسمع الكلام، لكنه أصر. وبعد الفيلم تعب ودخل المستشفى، وبقى يسأل عليا، وكل ما أروح ألاقي ناس ما لهاش لزمة وهو ما كانش بيحبهم، قال لي فارضين نفسهم عليا".

وحكت أنها في يوم وفاة أحمد زكي كانت في اليمن، وكان معها شقيقها، وقالت "ولقيته بيقول لي هاقول لك خبر صعب، وما كنتش مصدقة، وبعدها لقيت تليفزيون اليمن بيذيع، وعملوا عزا في الأوتيل اللي كنت مقيمة فيه".