قالت الإعلامية سهير جودة، إن الكراش هو مصطلح جديد منتشر بين الشباب، وهو يعني الإعجاب بشخص سري أو غامض، قائلة: «المفروض إنه شخص مش معروف للآخرين أو أنا مبعرفوش للآخرين، وده المعنى الدقيق للكلمة، ولكن الترجمة الفعلية للأجيال الجديدة، أنهم بيراقبوا الشخص وهو بياخد باله، وبتعمله لايك وفولو وهو بياخد باله، بيبقى الطرف التاني عارف إن الطرف الأول بيفكر فيه».
وأضافت سهير في برنامجها الذي يحمل اسم «الستات» والمذاع عبر فضائية «النهار»، قائلة: «أن الكراش هو الامتداد الطبيعي لفكرة الحب من طرف واحد، وهي ترجمته كراش، ومين فينا مكانش كراش على النجوم، أو الإعجاب بشخص، فهو بقي حب من طرف واحد وده للمراهقين، لأن فيه حب للكبار من طرف واحد بشكل ناضج».
وأشارت: «وفي الجيل بتاعنا كان مستوى الكراش هما النجوم، زي أحمد زكي وأحمد مظهر، مرورا بالجيل الجديد زي أحمد عز وكريم عبدالعزيز، لحد لما كنا بنحب حد نعرفه اسمه حب من طرف واحد، لان هو مبيبقاش حب، وبالمناسبة الجيل ده بيتعامل مع الإعجاب بشكل بسيط عن تعامل الجيل بتاعنا تماما».
وتابعت سهير: «الأول أنا كنت بشوف أن الحب من الطرف واحد في فترة المراقة غير حقيقي وغير ناضج، لكنه كان أقوى وأعمق، والسوشيال ميديا سهلت التواصل، لكن زمان لما واخدة تعجب بواحد تقعد تستنى هتشوفه تاني أمتي، ده من التفاصيل اللي كان فيها عمق للحب، لكن دلوقتي مفيش أي عمق خالص».
وأوضحت: «لفظ الكراش بيتكرر كتير بالعدوى، والحياة اختلفت وبقت أسهل لكن مش أعمق ، فبقت المشاعر كلها سطحية، يعني فكرة إن كل حاجة بقت سطحية مبقتش في حاجة عميقة، وفي ناس تحت السطح بيكونوا أنضج وأكبر وممكن يحصلهم الحب من طرف واحد، أحيانا بنقابل الشخص الصح في الوقت الغلط والظرف الغلط، وأحيانا بنقابل الشخص الغلط في الوقت الصح والظرف الصح، والناس اللي بتقع في الشخص الغلط بيبقوا لسه موصلوش لمرحلة النضج».
وأكدت سهير: «الحب من طرف واحد بيبقى فيه تراكمات ومواقف وتبقي فاهمة نفسك والشخص اللي قدامك، وفي الأغلب بيبقى في تعامل بينهم، في ناس بيبقى عندها من النضج والاتزان أن ده بيعملها سعادة لما تحب من طرف واحد لأنها مبتبقاش منتظرة الجواز وبتبقي متفهمة الظرف اللي انتي فيه والظرف اللي فيه الطرف التاني».
تابعوا أخبار بلدنا اليوم على Google News
