زميلك هو اللى هيشيلك.. ميدو ينتقد ردود أفعال الشناوي في مباراة بيراميدز

انتقد مقدم برنامج الريمونتادا ولاعب الزمالك السابق أحمد حسام ميدو، ردود أفعال حارس مرمى الأهلي وقائد الفريق محمد الشناوي، بعد دخول هدفين مرماه.

وقال ميدو:" جمهور النادي الأهلي حاسس إن فيه تغير في أداء محمد الشناوي كقائد مش كحارس مرمى".

وتابع:" جمهور النادي الأهلي في ماتش بيراميدز، هتف يا شناوي لو انت القائد اديني أمارة، يا شناوي بص على الشارة، والجمهور شايف إن فيه حاجة غلط".

وأضاف ميدو:" هما عايزين يوصلوا له رسالة إن القيادة مش شارة بس، ولكن علاقتك باللعيبة، متخسرش الخط إن اللعيبة بتحترمك كقائد وكابتن، وإنك تشيلهم الخسارة أو أي هدف يدخل مرماك".

وأكمل:" لعبت تحت قيادة الكابتن حسام حسن وهاني رمزي وأحمد حسن وتوتى وروبي كين ونجوم كبار جدا، الكابتن الصح هو اللى دايمًا بيدور على مصلحة لعيبته ودايمًا بيحمي لعيبته".

وختم:" إنما النهاردة محمد الشناوي ومش عايزه يزعل مني لازم يكون أهدأ في ردود أفعاله بعد الأهداف، واللى عمله مع علي معلول والتشويح ده ممكن يعمله في أوضة اللبس، إنما قدام الناس لازم أحمي زميلي لأنه هو اللى هيشيلني".

وخسر الأهلى من بيراميدز بنتيجة 2/0 في إطار الجولة الخامسة والعشرين من بطولة الدوري الممتاز، ليتجمد رصيد الأهلي عند 48 نقطة.