رسائل نارية من حمو بيكا للمتنمرين على مرضه

أعلن مؤدي المهرجانات حمو بيكا، عن تطورات حالته الصحية، بعد الوعكة الصحية التي تعرض لها مؤخرا، حيث تعرض مؤدى المهرجانات لعدد من التعليقات التي تتنمر عليه وأخرى بالدعاء له.

وكتب حمو بيكا، عبر حسابه على فيس بوك: "أنا بجد حابب أشكركم على دعواتكم ليا في مرضي ووقفتكم معايا دي،️ بجد أنا بحبكم جداً من كل قلبي، أنا بيكم مكمل وهكمل لآخر نفس فيا".

وأضاف: "أنا الحمد لله بقيت أحسن بكتير وادعولي ربنا يفكها عليا وأقدر أسعدكم كمان وكمان، دمتم سند وضهر ليا".

وأكد: "حابب أوجه رسالة للناس اللي مش بتحبني وكانت شمتانة وبتتنمر عليا: أنا برضه بحبكم وهفضل شايلكم على دماغي من فوق، وربنا ما يجعل عندكم أي مرض وأي حاجة وحشه أبداً ويديكم على قد نيتكم وقلبكم يارب ويديكم كل الرزق".

سبق أن الإعلامية بسمة وهبة، كشفت عن حقيقة إصابة حمو بيكا، بمرض نادر.

وأوضحت" خلال مقطع فيديو عبر حسابها بموقع إنستجرام، :" على فكرة يا جماعة موضوع حمو بيكا ده شهادة حق حقيقي".

وأضافت: "وقت خلاف حسن شاكوش، وحمو بيكا، استضفت شاكوش، وسألته هل فعلا حمو، بيأخذ حقن غالية رد وقال حمو بيكا، مش بيدعي وحقيقي تعبان وربنا يعفي عنه".

بينما نشر حمو بيكا، مقطع فيديو عبر صفحته على موقع التواصل الاجتماعي فيسبوك، يرد فيه على حالة التنمر التى يتعرض لها بعد أزمته الصحية.

وقال: “لما ربنا ياخدني هستريح، أحسن ما أعيش مش عارف أخد حقي، بلاش تتنمر على الناس، استفادتوا إيه لما بتتنمروا عليا، مش بقول غير حسبي الله ونعم الوكيل في كل واحد قال عني كلمة وحشة، ربنا يهديك لنفسك، لأن اللي عندك ده مرض”.

يذكر أن مدير أعمال حمو بيكا، كشف عن تطورات حالته الصحية بعد إصابته بوعكة صحية نقل على أثرها إلى المستشفى بعد عرض حلقته ببرنامج "كلام الناس".

وقال : "امبارح بعد انتهاء الحلقة، بيكا كان مضايق جدا من اللي بيحصله والظلم اللي بيتعرض له، وفي الحلقة عيط وكان متأثر جدا، وخرجنا من القناة وكنت على باب مدينة الإنتاج الإعلامي، وفجأة لقيت حمو بيقع مني في العربية».

وتابع: "أخذت حمو بيكا وطلعت بسرعة إلى المستشفى، وكمان أنا على علم بمرض حمو النادر مرض "الكرونز" اللي هو سبب في كرشه الكبير، وكنت خايف عليه جدا ليحصله حاجة، وعند وصولي إلى المستشفى تم حجزه والدكتور شخص حالته بأنه ضغط نفسي وكان ممكن يسبب "جلطة" ولكن هو الحمد لله استقرت صحته».

وأردف: "الدكتور طلب منه الخروج من المستشفى والمكوث بمنزله وهو سيتولى رعايته من المنزل، وهو لازم ياخد حقنة كل 3 أشهر عشان "الكرونز" وهي ميعادها خلال الأسبوع الجاري".