قال الفنان أحمد سعد، إن كل المشكلات التي حدثت بينها وزوجته علياء بسيوني، كان السبب الرئيسي فيها "الجوع"، موضحًا: "لازم أاكلها دايما، اخاف تنزل الشارع حد يضحك عليها ويأكلها بسندوتش".
وأضاف سعد خلال حواره مع الإعلامية بسمة وهبة مقدمة برنامج "90 دقيقة"، الذي يعرض عبر شاشة "المحور": "عشان أراضيها لازم أديها سندويتش، وبعدها ممكن تتنازل عن أي حاجة، لكن مش أي حاجة، في مرة قالت لي عاوزين ناكل من كبدة الفلاح، فقلت لها سندويتشين؟! قالت لي وجبات".
لترد عليه زوجته قائلة: "يومي كله اكلت فيه سندويتش أنهيه بفينو؟!"، لترد عليه بسمة وهبة قائلة: "أوفر من اللي بتتصالح بألماظ".
وقال أحمد سعد: "لأ طبعا، الألماظ ده بيبقى مرة واحدة، إنما انا لازم أجيب 5 وجبات في اليوم، أجيب ألماظ أحسن، كنت عايز أخد قرض من البنك عشان أأكلها بالقسط".
وأشار، إلى أنه قرر أن يكون حفل زواجهما بعيدا عن الصحافة والإعلام: "حددنا موعد الحفلة 7 مرات، حصل عوكسات غير عادية، رغم إننا بنحصن نفسنا بالصلاة والأذكار".
وواصل: "حجزنا في نصف جوامع وفنادق مصر، ولسه موجودة، لأننا بنتخانق مع بعض، ولما أقولها هاتي المقدم تقولي مليش دعوة، وكلها خناقات مفتعلة بشكل غير عادي، رغم إن الحاجات الكبيرة بتعدي، وأخر ما زهقنا حددت موعد كتب الكتاب مع والدتها من غير ما نعرفها، إن شاء الله أتجوزها بلبس الجيم".
وأشار، إلى أن أشقائه غضبوا منه بسبب عدم الإعلان عن موعد زفافه: "مقلتش لأي حد، والناس عرفت من الصحافة إني أتجوز، أخويا عمرو سعد معرفش ومفيش مخلوق عرف، حتى هي اتفاجأت وقلت لها بعد بكرة كتب كتابنا، وفي الآخر خبر الزواج طلع قبله بيوم ومنعرفش ازاي".
تابعوا أخبار بلدنا اليوم على Google News
