القصة الكاملة بشأن التسجيل الصوتي لوالد حسام حبيب واستغلال شيرين

شهدت الساعات القليلة الماضية، ضجة على السوشيال ميديا، وذلك بعدما انتشر تسجيل صوتي لحسين حبيب والد الفنان حسام حبيب، يتحدث خلاله عن خطة نجله للزواج سراً على شيرين عبد الوهاب.

وانتشر المقطع الصورتي المنسوب لوالد حسام حبيب، يتحدث فيه عن نيته الزواج علي شيرين عبدالوهاب من أجل إنجاب أطفال، ويعترف بأنه يتحكم في جميع الحسابات المالية لها، وأنها شخصية "ملولة" وتطلب الطلاق باستمرار.

التسجيل الصوتي لوالد حسام حبيب

وجاء في التسجيل الصوتي: "ابني حسام بيتحكم بجميع حسابات شيرين عبدالوهاب وبيسحب كل ما يشاء من أموالها، وأيضا حسام ووالدته مبيحبوش شيرين عشان هي كمان كانت ترغب في الطلاق منه".

وأضاف: "حسام متزوج منها وبيشتغل معاها مدير أعمالها من المفروض بقى أنه يكون له نسبة من الأرباح مثل نسبة مدير أعمالها القديم ياسر خليل، أنا عارف حسام ابني دماغه سم وهو ذكي جدًا ومش سهل، فأكيد هو في دماغه حاجه ومأمن بنفسه جدا، وشيرين عامله لحسام توكيل بدليل أنه معاه الفيزا بتاعتها وبيقدر يسحب من حسابها، وعارف الرقم السري، بس هو بيروح يسحب الفلوس اللى هو عايزها بس".

وتحدث عن علاقة الكره بين شيرين عبدالوهاب وأسرته، وخاصة والدته حيث قال: "إيمان أم حسام مش بتحب شيرين، إيمان تنكة، وعاملة زي المليونير لما يفلس هي صرفت الفلوس اللي أبوها سابهالها وصرفت فلوس حسام، شيرين عايزة تقولها بتتنكي على إيه يا روح أمك ده أنا عزماكي وهتسافري على حسابي والفندق على حسابي".

واستطرد: "حسام قالها ما يصحش انتي كده بتطردي أمي وبتطردي أختي، قالت له بقولك ايه انا مش طايقاهم ولا طايقاك انت كمان، قالها طيب انا مسافر، قالتله في ستين داهية وطلقني قبل ما تمشي، المهم سافر خد أمه واخته وجه، لقيت شيرين بتطلبني وبتقولي عايزة أطلق لو سمحت خليه يطلقني، عملنا عليها تمثيلية بقى إن انا جبت المأذون وأنه كتب خلاص الطلاق بس انا قولتله استنى شوية لحد بس شيرين ما تهدى عشان لما تاخد القرار تاخده وهي هادية، قومنا كام يوم كده وصالحناهم على بعض وخلاص، إيمان مش بتحبها عشان شيرين بلدي، هي أصلا إيمان جدودها من تركيا ومن النمسا، وحسام تعليمه أجنبي لكن شيرين ماعرفش واخدة ايه، دبلوم صنايع ولا مش دارسة مش عارف".

وكشف عن رغبة نجله في الزواج بأخرى للإنجاب، قائلا: "نفسي يبقى عندي حفيد، أنا باحب الأطفال جدا بالذات لما يبقى حفيدي، وبعدين نفسي أجيب عيل أنا نفسي أخلف أنا كمان، ليه حسام ميتجوزش بالسر مثلا، أنا فكرت في خطة حلوة أوي، أنا هقوله يجي يتجوز ويخلي مراته عندي، وميقولش لشيرين ويبقى يجي ينام معاها هنا عندي، هو ساعات بيروح ينام عند أمه في الرحاب في التجمع، المهم مرات حسام تقعد معايا هنا، وحسام يبقى رايح جاي من غير ما يقول لشيرين.. لما تحمل وتخلف ويبقي عنده عيل فرحان كده بيه عايز يقولها يقولها ميقولهاش هو حر، هو مقتنع بكلامي وهو قالها إنه هيتجوز عشان عايز يخلف".

وأضاف: "أنا شايف إن شيرين قضت على حسام، يعني من ساعة ما حسام عرفها مش داريان بنفسه، لا نزل أغنية ولا اشترك في فيلم ولا مسلسل، يعني هي سحبت كل وقته وخدت نجوميته وضافتها على نجوميتها هي، هي داست عليه وطلعت على حسابه هو".

والد حسام حبيب ينفي التسجيل الصوتي المنسوب له

وخرج حسين حبيب والد الفنان حسام حبيب عن صمته لينفي تلك الشائعات، قائلًا:"ما أثير هو كذب وافتراء".

وأكد والد المطرب، في تصريحات صحفية ، إن ما جاء في التسجيل ليس صوته.

هاشتاج " كلنا شيرين" يتصدر تويتر

هذا وتصدر هاشتاج" كلنا شيرين" موقع التواصل الإجتماعي " تويتر"، وذلك عقب التسجيل المثير الذي نشرته إحدى المجلات خاص بوالد المطرب حسام حبيب.

كانت الفنانة شيرين عبدالوهاب،قد نشرت صورة لها رفقة حسام في عيد ميلاده في صورة عبر تويتر و علقت عليها: "كلّ سنة وأنت طيب يا حبيبي، وكلّ سنة وأنت أماني وسندي ونجاحي وجاهي ومالي»، وتابعت «بحبّك، بجد كلمة قليلة على إحساسي".