بوبو يوجه انتقاد لاذع لإدارة فيوتشر.. تفاصيل

نشر محمد رضا بوبو، لاعب فريق بيرميدز الحالي وفيوتشر السابق، "بوست" على شبكة التواصل الاجتماعي فيسبوك، ينتقد فيه إدارة نادي فيوتشر؛ بسبب مستحقاته المالية المتبقية لدى النادي.

بوست رضا بوبو

وكتب بوبو: "خلاص مبقيتش قادر أصبر أكتر من كده، بصراحة حتى لو العواقب كتير لو هيحصل أي، المهم اهدي النار اللي جوايا شويه؛ عشان أكون حتى أرتحت من جوايا وكده كده ربنا موجود وهيجبلي حقي".

وأضاف أن: "أنا كنت خلصت وجالي اتصال تعالا ضروري النادي عشان تمضي الاستغناء بتاعك؛ عشان خلاص أنت مشيت قولت حاضر وركبت عربيتى وطلعت علي النادي".

وتابع: "الساعه 11 بالليل الناس قابلتنى ف النادي، وقالولي عامل أي يارضا عايزينك تمضي ورقتين ورقة مخالصة والاستغناء؛ قولتلهم الاستغناء حاضر همضي مفيش مشكله امال أي اللي يخليني أمضي مخلصه وأنا ليا 4 ملايين و 200 ألف جنية".

وأكمل قائلًا: "في واحد لا داعي لذكر اسمه؛ لأنه ميعرفش ربنا طبعا، قعد يكلمني ولازم تمضي ولازم تمضي، أقوله إزاي ياكابتن امضي مخالصة وأنا ليا فلوس؟ قولت مش همضي ومشيت ومضيت علي الاستغناء".

واستكمل: "جالي اتصال أمضي وأنت فلوسك عندي، ومتقلقش أمضي وانت وزملائك اللي ماشييين هنيجي ونسلم عليكم وتاخدو الشيك بالدولار زي باقي الفرقة ونشكركم أكيد".

واستطرد قائلًا: "يعني قال أه أمضى بس، واتفقت مع الاثنين اللي كانوا معايا عشان كنا متفقين أننا هنعمل كل حاجه بالإتفاق مع بعض، فقالوا هنضمي كلنا ونروح الثلاثاء ناخد الفلوس".

وأردف: "مضينا على الورقة، وجاء يوم الثلاثاء، لقينا اللعيبه كلها صحبنا اللي في الفرقه، طلعلهم فلوس وكل واحد شيك، ماعدا أحنا التلاته والتلاته المعاريين اللي مشيوا من النادي".

وأكد بوبو قائلًا:اتصلت بالشخص ده قولت له الشيك بتاعنا أمتى؟ قالي بالليل في وفي ناس الصبح وفي ناس بليل، وأنت بالليل، قلت له ماشي".

وأوضح أن: "جاء بالليل كلمته، قالي الصبح فضلت علي الحال ده كل يوم يوم يقولنا التلات الجاي، ييجي التلات يقول الاسبوع الجاي، ييجي الاسبوع الجاي يتقال، بكرا كمان يومين علي الحال ده، ف حد مشكور طبعا بدون ذكر اسمه، قالي أنا بحبك وأنت أخويا الصغير، لو أنت مفكر انك طلعلك فلوس يبقا بتحلم".

وأشار بوبو في رسالته: "مصدقتيش وقولت لا أكيد الفلوس هتطلع الناس كلموني وقالولنا الفلوس عندنا وأنا مصدقهم ومعايا، بس من الواضح أن مفيش فلوس جايه ولا أي حاجه".

لافتًا النظر في نهاية رسالته، لحزنه الشديد مما حدث له من جانب المسئولين في نادي فيوتشر، مشيرًا أنه لم يبخل على النادي في أي شيء، لكن النادي قابل ذلك بالنكران، على حد تعبيره.