مستحيل ألحن مهرجانات.. أبرز تصريحات رامي جمال مع أسما إبراهيم

رامي جمال.. تصدر اسم الفنان رامي جمال، ترند محركات البحث خلال الساعات الماضية، وذلك بعد تصريحاته الجريئة خلال لقائه ببرنامج "حبر سري" الذي تقدمه الإعلامية أسما إبراهيم بقناة "القاهرة والناس".

رامي جمال واليسا 

علق المطرب والملحن رامي جمال، على الانتقادات التي توجه للفنانة إليسا بسبب أن صوتها في "الأوديو" مختلف عن الحفلات.

وقال رامي جمال: "مش حاجة سهلة إن المطرب يبقى صوته في الإستوديو زي اللايف، دايمًا بيبقى فيه شوية اختلافات، وجودة الإستوديو مش موجود في اللايف، لكن إليسا هي إليسا".

تابع:"هي بتتهاجم علشان جريئة وليها شخصية ورأي، والفرقة الموسيقية مش بتظلمها في اللايف، لكن الحالة المزاجية بتأثر في أي مطرب في الحفل".

تحدث رامي جمال، عن تفاصيل تعاونه مع إليسا و سعد لمجرد في أغنية "من أول دقيقة" , قائلا:" اليسا كانت مخبية عليا أن سعد لمجرد هيشارك معاها في أغنية من أول دقيقة معرفش السبب ليه، بس أنا عشان اللحن يظبط معايا أصريت إن أعرف مين عشان أعرف أطلع شغلي بشكل كويس، وممكن يكونوا مقالوش عشان مكنوش اتعاقدوا بشكل رسمي مع سعد لمجرد".

وعن رأسه في قضية سعد لمجرد، قال رامي جمال:" معنديش مشكلة مع قضيته هو لحد دلوقتي مصدرش حكم ضده وياما سمعنا عن المشكلة دي مع لاعبين كرة وطعلوا مظلومين، وبعدين سعد بيقدم فن مليش دعوة بحياته الشخصية، وعلى تعاملي معاه سعد لمجرد متربي جدا ولو ليه غلطات فإحنا مش أنبياء وكلنا بنغلط ومغلطش غلط كبير إن حد يقولي انت بتتعاون معاه ليه".

رامي جمال: أرفض الغناء بمكان فيه خمر وراقصات

وعلق عن ابتعاد أدهم النابلسي عن الغناء من باب إنه حرام، علق رامي جمال: "أنا مش شيخ وشايف إن كل الشغلانات فيها حرام وحلال، ولكن فيه شبهات ممكن الواحد يتجنبها ومش عايز أحددها علشان لو زمايلنا بيعملوها ربنا يهدي الجميع، فكرة إني أغني في أماكن فيها شرب مشكلة بالنسبة لي مش بغني في أماكن فيها شرب، ولو أنا في مكان فيه رقاصة مش بشتغل، ولو في فرح مستحيل الرقاصة تطلع في فقرتي والرقص ما ينفعش يتجمع معايا وأنا بغني ببقى شايف إني لازم آخد الاهتمام كامل".

وتابع: "لو أدهم النابلسي مرتاح في اللي هو عمله احنا عايشين مرة واحدة وظيفته إنه ينام على مخدته مبسوط، وأنا فكرت في الاعتزال ودا له علاقة بالإحباط وإصابتي بالبهاق ودينيًّا دايمًا بفكر في كل حاجة، بس مت جاش في بالي اعتزالي من باب ديني، وعملت أدعية بصوتي".

رامي جمال ومطربي المهرجانات 

أكد الفنان رامي جمال استحالة تقديمه ألحان لمطربي مهرجانات: "مستحيل ألحن مهرجانات ومش ذوقي وأنا اتحاسب على اللي بعمله ومش عايز أقدم فن اعتذر عنه بعد كده في يوم من الأيام، حتى لو الدنيا جت عليا مش هغني مهرجانات واستعين بأهلي".

وكشف رامي جمال على أمنيته قائلا : "في الجيل الحالي نفسي ألحن لمحمد منير، وناقصني أسمع اغنية بصوت عمرو دياب وجت الفرصة زمان بس ما كنتش مناسبة وكان فيه تفاصيل ما اتفقناش".