قال رضا عبد العال، نجم الأهلي والزمالك ومنتخب مصر السابق، إن محمد صلاح لاعب مهاري وأفضل في الأداء الفني من كريستيانو رونالدو، موضحًا أن رونالدو لاعب يعتمد على القوة أكثر من المهارة.
وأضاف «عبد العال» في حوار خاص لـ«بلدنا اليوم»، أن العنصرية لها تدخل كبير في عدم وصول المغرب إلى المباراة النهائية من كأس العالم بقطر، مشيرًا إلى أن بعض رأي أن العرب يكفيهم الوصول للنصف النهائي فقط، وإلى نص الحوار..
س- في البداية كيف تقيم يورجن كلوب مدرب ليفربول خاصة بعد تراجع أداء الفريق مؤخرًا؟
مدرب كويس يأتي في المرتبة التانية بعد جوارديولا.
س- هل يصنف محمد صلاح ضمن قائمة أفضل اللاعبين الذين يمتلكون المهارة؟
بالنسبة لنا نراه لاعب مهاري، كريستيانو رونالدو أهدافه كلها معتمدة على القوة والقفز والعرضيات، ولكن أهداف صلاح فيها مهارات بس مش زى مهارة ميسي، وكريستيانو لو مش واقف على رجله مش هيجيب أهداف، أهدافه مفيهاش لمسة المتعة، صلاح ومبابي أحسن من كريستيانو وميسي رقم واحد.
س- كيف ترى حظوظ منتخب مصر فى نسخة كأس العالم 2018 في حالة وجود محمد صلاح وعدم إصابته؟
لم يختلف الأمر في شيء لأن المنتخب وقتها كان يدربه مدرب ضعيف.
س- ولكن يرى الجمهور أن هيكتور كوبر أفضل مدرب تألق معه صلاح؟
صلاح كان متألق مع كوبر عشان محدش كان عارف لسه طريقة لعب صلاح، الكورة كانت بتتلعب له في مساحة يجري ويجيب جول، ومن وجهة نظري أكتر مدرب تألق معاه هو برادلي، كان في أبو تريكة وبيحطله في المساحة ويجيب الجول، كوبر كان بيلعب بطريقة باصي لصلاح.
هل ترى أن المنتخب في هذا التوقيت كان قادر على استغلال قوة صلاة ومهاراته بخلاف ما يحدث حاليًا؟
مهو لما بيتمسك أنت خلاص مفيش أى تواجد، طريقة كوبر مكانتش تنفع في كاس العالم، وأنا قولت إننا هنبقى حصالة عشان هو بيلاعب منتخب روسيا زى منتخب السويس.
س- إذا ما هي المواصفات الواجب توافرها في المدير الفني لمنتخب مصر من وجهة نظر رضا عبد العال؟
اللعبة اسمها كرة القدم، ليه علشان هى مش لعبة العفيجية كرة القدم لعبة الإبداع، كرة القدم اللي عرفناها واللي حبيناها لما شوفنا الخطيب وكابتن حسن شحاتة وفاروق جعفر الناس دي كانت أساطير بالنسبة لنا فإحنا حبينا الكورة والمهارة عشان كدة، فمثلا جوارديولا هو اللي طلع ميسي في أحسن شكل وخلاه يفجر كل مهاراته لو واحد زى مورينهو كان ممكن يبطله كورة، ويقول أصله مبيدافعش والكلام الفاضي ده.
يتداول معلومات حول عدم اقتناع جوارديولا وقت تدريبه برشلونة بقدرات ليونيل ميسي وأن مساعده هو من أقنعه ببقائه في الفريق.. كيف ترى ذلك؟
دي معلومة خاطئة ممكن تقول الكلام ده لما ميسي كان لسه بادئ مع فرانك ريكارد، بس لما جوارديولا مسك أول ناس لعبهم مع بعض تشافي وإنيستا وميسي وبيدرو وفيا, فهو الفضل في تألق ميسي يرجع لجوارديو، لأنه عمل مزيج من اللاعبين يخدم ميسي ويجعله في أحسن شكل لأن لو ميسي أتقطعت منه الكرة إنيستا يجيبها يرقص يعمل مساحة لميسي اللي جاى من ورا ويجيب جول، يعني مثلا فرقة الأرجنتين مش عارفين يساعدوا ميسي لأن اللاعبين من حوله ضعاف ولم يمتلكوا حلول مثل فريق برشلونة، مش عندهم نيمار وتشافي وبوسكيتس وسواريز كل واحد فيهم فرقة لوحدة، إنما في الأرجنتين كل الاعتماد على ميسي في التحركات في الباص في الأهداف، لما تحط كفة برشلونة مع الأرجنتين الكفة تطب لبرشلونة، فالناس كانت ظالمة ميسي وهو بيلعب في الأرجنتين لأن اللاعبين الخمسة من الأرجنتين ميعملوش لاعب واحد من برشلونة.
س- هل تتفق مع مقولة إن «ميسي له الفضل على جوارديولا» خاصة وأن جوارديولا لم يحصل على بطولة دوري الأبطال سوى مع ليونيل؟
في بطولة دوري أبطال أوروبا 2019 لما كان بيلاعب توتنهام ويجيبوا جول في الوقت بدل الضائع وميتحسبش ويجي فيهم جول بلمسة يد واضحة وصريحة تعرف أن في مراهنات هى اللي بتتحكم في نتيجة الماتشات، وفي فرق لازم توصل عشان التسويق والدعاية والرعاية، زي كأس العالم هتروح بعيد ليه فلما تشوف فرنسا بتلاعب المغرب وفي ضربتين جزاء ميتحسبوش ده يعني يرضي ربنا هنا بقى تدخل حتة العنصرية إزاى العرب يوصلوا للدور نص النهائي.
ولكن تحدث البعض عن عدم صحة ضربة جزاء المغرب.. فما ردك؟
اللي قالوا كدا مبيفهموش، دي كورتين فيهم ضربة جزاء مش كرة واحدة، اشمعنا مبابي ودي ماريا يتحسبلهم ضربات وكمان مشكوك فيهم، ففي وقت الأوقات مهما عملوا فار وتقنيات حديثة العنصرية بتغلب، في ماتش المغرب وكرواتيا كان في ضربة جزاء لأشرف حكيمي متحسبتش لو جت كانت المغرب بقت ثالث، هما قالوا كفاية كدة على العرب، إنما والله العظيم في ماتش فرنسا ليهم ضربتين جزاء لو كان واحدة اتحسبت كانت غيرت نتيجة الماتش.
- من وجهة نظرك من أفضل مدرب في كأس العالم النسخة 2022؟
مفيش غير سكالوني عشان معاه ميسي، ميسي كان بيفتحله الأبواب المقفولة بس هو لعب في النهائي دي ماريا وهو كان بيقعد على الدكة، ودي ماريا خفف عن ميسي وريح ميسي أكتر وهذا يحسب للمدرب إنه عنده وجهة نظر واختار اللاعب الصح في التوقيت المناسب.
س- وماذا عن أفضل لاعب في البطولة بعد ليونيل ميسي؟
ممكن نقول مبابي، بس قبل مبابي ممكن أقول جريزمان لاعب بيصنع لعب كويس وبيدافع وبيهاجم بس أنا شايف إنهم افتقدوا بنزيما.
وكيف ترى غياب كريم بنزيما عن المنتخب الفرنسي في كأس العالم وهل نجح جيرو في تعويض غيابه؟
بنزيما فرقة لوحده، يعني محطة ويعرف يجيب جول ويعمل جول لما يكون الماتش مقفل لاعب كورة محترم، لاعب محطة وبيسجل أهداف، في لاعبين آخرين محطة ولكن غير قادرين على تسجيل أي أهداف.
ولكن لماذا لم ينجح بنزيما في تسجيل الأهداف مع ريال مدريد واكتفى بدوره كلاعب محطة في المنطقة الهجومية لريال مدريد؟
كريستيانو رونالدو وقتها كان موجود، وكان لازم كل الفرقة تخدم على رونالدو، غياب بنزيما سبب مهم جدًا أن فرنسا تكسب إنجلترا بصعوبة وكانوا هيكسبوا الأرجنتين لو موجود.
س- وما رأيك فيما أشارته إليه بعض التقارير الصحفية حول استبعاد كريم بنزيما من المونديال بفعل فاعل؟
بنزيما لم يكن مصاب، اللاعبين والمدرب عملوا عليه مؤامرة وطلعوه من الفريق، والحاجات دي بتحصل لما كنت بلعب ممكن اتنين صحاب علاقتهم جامدة ببعض فبيأثروا على المدرب وممكن يعملوا مؤامرة على لاعب على مدرب على رئيس نادي.
س- وكيف ترى مستقبل مرابط وأوناحي بعد تألقهم مع المنتخب المغربي؟
مرابط ماتشات كويس وماتشات مش موفق، وأوناحي أخد أكتر من حقه لأن هناك ماتشات مثلا كان ممكن بدل ما يشوط يقوم ناقل الكرة لأي لاعب آخر؟
س- إذا هل رضا عبد العال غير مقتنع باللاعب المغربي أوناحي؟
لاعب صغير وطريقة لعبه مثل طرق لعب الناشئين وأخد أكتر من حقه وهو ميستاهلش يعني مرابط وحكيمي وبونو هما ليهم فضل أكبر في إنجاز المغرب.
س- وما رأيك في أداء روي فيتوريا مع المنتخب المصري؟
معندوش فكرة؟
س- كيف ترى ذلك خاصة وأن المدرب حتى الآن لم يخض مباريات كثيرة مع المنتخب؟
طالما بيجري وخايف من اللاعبين والسوشيال ميديا ويضم ده وده على حسب السوشيال ميديا يبقي مينفعش مدرب.
س- هل تقيم المدربين حسب أدائهم الفني أم وفقًا لشخصيتهم القيادية والتصرف في المواقف الصعبة؟
الاثنين.. في لاعبين لم يراهم وقام بضمهم، المفروض يجيب اللاعبين اللي قام برؤيتهم يلعبوا قدام عينه وميجيبش لاعبين قاعدة مبتلعبش لمجرد إنهم كانوا القوام الأساسي للمنتخب، في واحد اسمه مروان عطية شغال فحت وردم، في واحد اسمه مهند لاشين شقيان، وفي واحد اسمه عمرو السيسي، لاعيبة أحسن من طارق حامد وحمدي فتحي.
س- ولكن الغالبية من الجمهور والمحللين يرون أن هناك تحسن في الأداء مع روي فيتوريا؟
كل دا أونطة وهجص، الإعلام يقوم بتوجيه الناس مهللين لروي فيتوريا بداعي أنه كسب بلجيكا، بلجيكا مين، كان عندك ماتش النيجر وليبيريا،عملت فيهم إيه دا أنت كسبان بالضالين ومكانش فيه شكل ولا أداء طول ما فيه عمر جابر والشناوي والناس ومحدش منهم هيتغير يبقي عليه العوض.
تابعوا أخبار بلدنا اليوم على Google News
