احذروا المخدة الكهربائية.. نجاة إعلامية شهيرة من الموت حرقا أثناء النوم

قالت الإعلامية والمحامية، أميرة بهي الدين مقدمة برنامج "افتح باب قلبك" المذاع عبر قناة “CBC” على صفحتها على موقع التواصل الاجتماعي “فيسبوك" أنها تعرضت  لواقعة احتراق لمنزلها بسبب “المخدة الكهربائية” التي كانت بالقرب منها أثناء نومها في ساعات الليل كاشفة ولكنها نجت. 

وأكملت الإعلامية "صحيت الساعة ٦ الصبح علي ريحة غريبة، وشفت دخان بسيط وسط الضلمة، اتحركت في السرير حسيت بسخونية غريبة جداااا".

وأضافت الإعلامية أميرة بهي الدين: "أنا بانام وحاطة علي طرف السرير جنبي بقالي كذا يوم، اللي بيسموها " مخدة كهرباء" صغيرة، بادفي عليها ايدي وأنا بانام، حسيت بسخونية وريحه غريبة ودخان، فتحت النور، لقيت " المخدة الكهرباء “ساحت واسودت واتحرقت ولزقت في اللي تحتها وفوقها وحرقت البطانية تحتها وفوقها والملاية اتحرقت والمرتبة اتلسعت وريحه الشياط رهيبة”.

وتابعت: “طبعا فزيت فصلت عنها الكهرباء وشلت كل حاجة بعيد عن بعض لانهم كانوا كلهم سخنين وبيسحيوا ويحرقوا بعض وفتحت الشباك وربنا نجاني من اصغر الشرر واكبر الحرائق ومن اللي معرفوش..”.

وواصلت الكاتبة الشهيرة أميرة بهي الدين: “سبحان من صحاني قبل مالدنيا تزيد عن كدة، سبحان من نجاني من شر أكبر ومن الكهرباء اللي سيحت المخدة الكهربائية وحرقت البطاطين والملاية ولسعت المرتبة ، سبحان من نجاني من الدخان البسيط والريحة الرهيبة ... فَاللَّهُ خَيْرٌ حَافِظًا وَهُوَ أَرْحَمُ الرَّاحِمِينَ”.

وأضافت: “اتخضيت جداااا ولسه مخضوضة لكن حامدة ربنا وشاكراه علي كل نعمه وربنا يكفينا ويكفيكم شر المستخبي اللهم امين ..عمري ماكنت لوحدي ابدا، لان ربنا معايا علي طول، قوته بتسندني ، وايده في ضهري ، ورحمته بتسترني وتهون عليا ..يالله ياولي الصابرين ... مددددد”.

وأكدت في أحدث منشور لها حاليا: "عمر جديد ، انا اتكتب لي عمر جديد ياسعاد الف حمد والف شكر لك يارب علي كل نعمك وفضلك ولطفك وكرمك وسترك والحمد لله ولا حول ولا قوة الا بالله العلي العظيم ، مددددد ياصاحب المدددددد ".