سهير جودة: أنا قريبة للناس اللي ذوقهم مش ويجز في الأغاني لكن بحترم نجاحه

حرصت الإعلامية سهير جودة، على تهنئة مطرب الراب ويجز في اختياره للغناء في حفل ختام نهائي كأس العالم قطر 2022.

 قائلة: «من يدعمه الجمهور هو بالجمهور مكتفي لا يعطله أحد، هو ده ويجز، ويجز هو تلخيص لشباب كتير عندهم أحلام، هو مصدق نفسه وحلمه عشان كده هو بالنسبة للشباب النجاح العصامي اللي بدأ من السوشيال ميديا».

وأضافت من خلال برنامجها "الستات" على قناة "النهار" قائلة: " لما الصفحة الرسمية للاتحاد الدولي لكرة القدم أعلنت إن أغنية عز العرب لمغني الراب ويجز هتبقى إحدى أغاني ألبوم كأس العالم، دي المرة الأولى اللي بيشارك فيها مغني مصري في الألبوم الرسمي للبطولة، وهو ترند رقم ٢ على يوتيوب ، و هنشوفه في حفل ختام كأس العالم".

وتابعت: "ناس كتير جدا شايفين ويجز أنه نموذج ملهم، وناس تانية شايفين اللي بيقدمه مش غناء، لو ذوقنا الشخصي هنقيس بيه الأحداث هنلاقي حاجات كتير مش فن، وخلينا نقيس بنسبة النجاح والنجومية، أكيد في ناس مصدقه ويجز، إن عنده شيء مختلف وحالة مختلفة، ولد ابتدئ صغير والنهاردة عنده ٢٤ سنة، وحقق شهرة عالمية واسمه بيتردد باحترام بين النجوم، إذا هو عنده شيء مميز ومختلف".

وأشارت: "أنا قريبة للناس اللي ذوقهم مش ويجز في الأغاني، لكن لازم نحترم هذا النجاح، أغنية عز العرب بالمناسبة حلوة جدا هو كاتب كلماتها، وخلينا ندعم الشباب المصري، وويجز نموذج بيحقق حلم الشباب في النجاح والإنجاز و بيتقبل الآخر، أعتقد الأجيال الجديدة معندهمش تنمر وعنصرية زي اللي كانت في الأجيال السابقة".

واختتمت كلامها قائلة: "مش بالضرورة نكون متفقين كلنا على ذوق واحد، لكن منحكمش على حد بذوقنا الشخصي ونقول إن دا لا يتوافق مع ذوقي فيبقى إيه الذوق ده والفشل دا، خلينا نبقى موضوعيين في الحكم، وشئنا أم أبينا ويجز هو نجم ملهم للجيل الحالي.