بعد وفاة ابنتي نظرتي للحياة تغيرت.. أبرز تصريحات باسم سمرة في "حبر سري"

السبت 26 نوفمبر 2022 | 12:42 مساءً
باسم سمرة وأسما إبراهيم
باسم سمرة وأسما إبراهيم
كتب : ريهام كمال

حل الفنان باسم سمرة، ضيفًا في برنامج "حبر سري" مع الإعلامية أسما إبراهيم، على قناة القاهرة والناس.

ويقدم لك بلدنا اليوم أبرز تصريحات باسم سمرة، خلال الحلقة:

- عمري ما قلت أن في مؤامرات ضدي في الوسط الفني، واللي مش مصلحته أنى اطلع هو اللي موهبته قليلة ويخاف أني أظهر أخذ منه الليلة.

- نظرتي للحياة تغيرت بعد وفاة بنتي والبهجة والسعادة مش موجودة والحزن وجعه مش بيخلص.

- عندي بنتين بـ100 راجل والبنات حنينة على أبوهم ورزقهم واسع، وأتمنى في زوج بناتي يكون حنين ويتقي الله في البنت عشان لو معملش كده هطلع عينه.

- نيللي كريم مكنتش عارفه تقول كلمتين في مسلسل ذات وأنا مش ليا فضل عليها، ولكن كنت أنا وانتصار منطلقين انطلاقة عظيمة.

- نيللي كريم، بتشتغل على نفسها وبعدين بقت نجمة جميلة.

- لو الورق والمخرج متوفر كويس هبقى أنا في أمان.

- محمد رمضان أخويا الصغير وعنده مشاكل كتير ولكن هو موهوب جدا ولو ركز هيبقى أحلى وأحلى ويكون نجم عالمي.

- رفضت دور جمال عبد الناصر وقدمه الفنان السوري جمال سليمان، وهو أستاذ كبير ولكن اللهجة إن عبد الناصر يطلع سوري كانت كارثة.

- نفسي اعمل شخصية تاريخية وهي محمد نجيب وعملت قبل كده عبدالحكيم عامر، والراجل ده اتظلم والتاريخ أنصفه لما تعمل قاعدة باسمه من أكبر القواعد العسكرية في مصر.

- نجحت في الأعمال الكوميدية مع محمد هنيدي وليلي علوي وفي مسلسل ذات، بفضل تمثيل كوميديا الموقف مفيش أدوار بتتفصل عليا وفي ناس بيتعمل لها أدوار مخصوصة وأفلام تتعمل لناس معينة وتتصرف عليها كتير وينقصني العلاقات والذكاء الاجتماعي، وعندي علاقات، ولكن مش بعرف استغلها وعمري ما برفع سماعة التليفون وأكلم حد على دور.

- تجربة تحول مشاهير السوشيال ميديا في التمثيل لا تستحق والتمثيل دراسة وقصور ثقافة وكل السوشيال ميديا لا اقتنع بها ولا اعترف بها ودي فساد وقلة أدب.

- المخرج المحترم والممثل المحترم لا يقبل المشاركة في تجارب مشاهير السوشيال ميديا.

- أبويا وأمي أكثر ناس بحبهم في حياتي وأمي نور عيني وعملت معاهم فيلم اسمه صبيان وبنات وحجاب.

- أنا عملت مسلسل الكيف وكان اسمي مزاجنجي والناس بتخلط الحاجة ببعضها وبطلع شائعات، وأنا صاحب مزاج أني اشتغل كويس واكسب كويس.

- توقف عرض مسلسلي "منورة بأهلها" و "منعطف خطر" بسبب دعمي للفنان محمد صبحي بعد الهجوم عليه.

- ندمت على تصريحي في أزمة الهجوم على محمد صبحي، علشان كان فيه مجهود ناس اشتغلت وراح مجهودهم في الهواء علشان غلطت غلطة واكتشفت إني خربت بيت ناس تعبت وشقيت وعرقت، وكنت سبب إن مجهودهم يروح بسهولة.

- لو أشرف زكي مكنتش تدخل مكنتش صالحت رحاب الجمل، وأنا بحترم النقيب وكبرته في المشكلة.

- اتصلحنا من زمان أنا وعمر كمال وهو صوت حلو ومحتاجين مواهب زيه ومكنش في خلاف حصل وهو ابني الصغير وأنا كبير بشخصيتي.

- أنا ممكن أموت عشان ولادي مش أقتل عشان ولادي وفي قانون ودولة وفي عرف ورجالة وعندي خطوط حمراء في تربيتهم زي أي بيت مصري وبعمل على أنهم يتعلموا لغات وفروسية وسباحة.

اقرأ أيضا