في أول ظهور له بعد خروجه من السجن.. أبرز تصريحات طارق النهري في "صاحبة السعادة"

حل الفنان طارق النهري، ضيفًا في برنامج "صاحبة السعادة" الذي تقدمه الفنانة والإعلامية إسعاد يونس، في أول ظهور له بعد الإفراج عنه بقرار رئاسي في شهر يوليو الماضي، تنفيذا للقرار الجمهوري الذي أصدره الرئيس عبد الفتاح السيسي، ويحمل رقم 329، بالعفو عن عدد من الصادر ضدهم أحكام قضائية.

ويٌقدم لك "بلدنا اليوم" في هذا التقرير أبرز تصريحات طارق النهري، في برنامج "صاحبة السعادة".

- أنا خريج معهد السينما، وبعد ثانوية عامة وفي أول سنة في المعهد حبيت أشتغل وأصرف على نفسي، فاشتغلت في مطعم واحد قريبي جنب مبنى التليفزيون كان مشهور بورق العنب بالكوارع.

- كنت بروح أقف كواليس في المسرح كانو بيقولولي متكلمش، كان زمان في حب يخلينا نشتغل بجد، والحاجات دي بقت دلوقتي محرمات، مع ان محدش بياخد رزق حد، الدنيا جميلة.

- لقيت المخرج نور الدمرداش معدي، وسألني إنت مين وبتشتغل إيه، وخدني من إيدي ودخلني التليفزيون، كان بيعمل مسلسل اسمه صرخة بريء وسألني تمثل، فكانت بدايتي من هنا.

- انا شوفت عالم وقابلت ناس مكنتش متوقعهم 90% منهم سوابق، وهناك في السجن كان بيتعاملوا معانا ياحترام وبيتقالنا ياأستاذ فلان، وكنت بحاول أوائم ظروفي جوه لأني كنت ما بين سياسي تقيل وجنائي.

- بعد خروجي من السجن حياتي اتقلبت 180 درجة، لأني اتعاملت مع ناس مختلفة، واتقبض عليا لأن اسمي اتحط في مجموعة معين فيه منهم أخطأ وشيلنا الليلة معاهم ولما صدر الحكم كنت في حالة مش طبيعية.

- أما دخلت السجن اتعلمت فلسفة تانية خالص، ولما جالي قرار العفو كان حلم بعيد ومكنتش متوقعه.

- توهت أول ما خرجت لفيت الشوارع كلها وكم الإنجازات اللي حاصلة في مصر شيء مبهر.. اللي بيحصل ده لو مكنش حصل في الوقت ده كنا هنكون دولة متخلفة.

وكانت قضت محكمة جنايات القاهرة، المنعقدة بأكاديمية الشرطة، في  23 فبراير 2019، برئاسة المستشار ناجي شحاتة، بمعاقبة الفنان طارق النهري، و9 آخرين بالسجن المؤبد، على خلفية اتهامه بالتورط في حرق المجمع العلمي والتجمهر والتظاهر وحيازة أسلحة نارية.

 وذلك قبل أن تقضي محكمة النقض، برئاسة المستشار عبد الله عصر، في 4 يوليو 2020، بقبول الطعن المقدم من طارق النهري، على حكم محكمة الجنايات، وتم تخفيف الحكم عليهم إلى السجن 15 سنة.

يذكر أن أخر أعمال الفنان طارق النهري، مسلسل "طاقة نور" عام 2017، بطولة هاني سلامة، حنان مطاوع، إيهاب فهمي، أشرف عبدالغفور، جيهان خليل، وهيدي كرم وغيرهم، ﺗﺄﻟﻴﻒ حسان دهشان، ومن ﺇﺧﺮاﺝ رؤوف عبدالعزيز.