اليوم.. أولى جلسات محاكمة المتهمة بقتل وتعذيب زوجها بالاشتراك مع عشيقها في بولاق الدكرور

تعقد محكمة جنايات الجيزة المنعقدة بمحكمة جنوب القاهرة بزينهم اليوم السبت، أولى جلسات محاكمة المتهمين المعروفة بـ جريمة بولاق الدكرور في القضية التي حملت رقم 2950 لسنة 2022 إداري بولاق الدكرور، والمتهم فيها سامية ع، ربة منزل وشقيقتها بدور، وعشيقها هلال 18 سنة، سائق توك توك، بتهمة قتل هيثم إ، بائع، مع سبق الإصرار بعد تعرضه للتعذيب وهتك العرض.

حيث أدلت المتهمة سامية ع، باعترافات تفصيليه للجريمة المدانه فيها بقتل زوجها برفقة عشيقها بعد تعذيبه: عشيقي هلال كان ييجي كل يوم يقعد معانا ويجيب الحشيش ونشرب أنا وهو وهيثم زوجي، وحصلت مشكلة بيني وبين زوجي هيثم عشان والدته كانت عايشه معانا في الشقة، وسبت البيت وسافرت الإسماعلية أنا وبدور أختي عشان نجيب شقة، بس الفلوس اللي معانا ماكنتش مكفية، فرجعنا أنا وأختي بدور ثاني بس رجعنا باتفاق إن هيثم يعاملني كأب فقط بدون معاشرة زوجية، وهو كان عايز يعاشرني واتفقنا إن هلال بييجي ينام معانا على السرير وأحط مخدة بيني وبين هلال في النصف، وأنا كنت بقول لهيثم أنا أضمن هلال ومش ضمناك أنت، وكنت بنام على الطرف وهيثم بينام في الطرف وهلال كان بينام معانا في النص، واستمر الموضوع ده ثلاث أيام.

استكملت الزوجة: فضلت أقوله احلف بالطلاق وهو كان رافض يحلف بالطلاق، وفضلت أستفز فيه لحد ما قال عليّ الطلاق أنا مقلتش لبنتي منى على حاجة، فأنا قلت له خلاص ماشي، وأنا قلت لبنتي أنا غضبانة منك عشان إنتي بتكدبي قالت لي إن باباها اللي قالها تقول كده، وفجأة دخل جوزي هيثم علينا وكان مخضوض، وقلتله كده أنا محرمة عليك وانت نزلت من نظري يا هيثم عشان انت كداب وبتكدب وحلفت بعرض بنتك كدب وبالطلاق كدب، وأنا صممت على الطلاق وهو كان بيقلي أهم حاجة النية، فقالي أنتي لازم عشان أطلقك تتنازلي عن العيال وتدفعي مصاريف المأذون وملكيش حاجة في الشقة قلت له إزاي أنت كده بتموتني وأنا عايشة هو عشان تطلقني لازم تعمل كده، وكان هلال واقف في المشكلة دي وهيثم قالي انتي عايز تلففيني حوالين نفسي تاني.

وتعود أحداث القضية الشهر مارس الماضي عندما تلقت الأجهزة الأمنية بمديرية أمن الجيزة بلاغًا يفيد بالعثور على جثة رجل في العقد الرابع من عمره، سقط من الطابق الرابع، وبجمع التحريات توصل رجال مباحث قسم شرطة بولاق إلى أن الزوجة وعشيقها اتفقا فيما بينهما على الزواج، فقررا إجبار الزوج على الطلاق، فوضعا خطة لتعذيبه بدأت بوضع مخدر في القهوة وتقييده بالحبال، والاعتداء عليه بالضرب المبرح وإحداث إصابته، وفي نهاية الأمر ألقياه من البلكونة وتم القبض على المتهمين ومازالت التحقيقات جارية في القضية.