محمد يسري في أول ظهور بعد أزمته الصحية: كل الشكر لنقابة المهن التمثيلية وربنا قدر ولطف

كشف الفنان محمد يسري، عن حالته الصحية، وتفاصيل تعرضه لـ جلطة في القلب الفترة الماضية، حيث خضع لعملية قسطرة وتركيب دعامة في القلب، وذلك من خلال فيديو له عبر حسابه الخاص بموقع تبادل الصور والفيديوهات الشهير إنستجرام.

وأوضح محمد يسري قائلا: "أنا مبسوط إني بعمل الفيديو ده بالذات بعد التجربة اللي عديت بيها، والحمد لله إني قادر أطمن الناس، أنا تعرضت من أسبوع فجر يوم الأحد لوعكة صحية، حسيت بوجع شديد جدًا في صدري، وضغطي وطي جدًا وجسمي كان متلج، مكنتش أعرف ده إيه وكنت متخيل إنه حاجة وهتعدي، خاصة إن مفيش سبب إن ده يحصل".

وأضاف محمد يسري: "قعدت شوية في البيت لأني للأسف مش شخص ممكن يروح المستشفى طواعية، ودي طبعًا كارثة، وبعد شوية ربنا ألهمني إني لازم أتحرك، وروحت المستشفى، الناس استقبلتني على طول، وكانوا متخيلين إن الدنيا تمام لأني دخلتلهم على رجلي".

وأشار محمد يسري، إلى أنه لم يكن يدرك مدى خطورة حالته الصحية، وقال: "لكن بعد ما بدأنا نعمل فحوصات طلع عندي جلطة في الشريان الأمامي في القلب، والجلطة دي عملت شبه انسداد كامل في الشريان، فالدم مش داخل بسهولة، فاضطريت في ساعتها إني أعمل قسطرة وأركب دعامة في القلب، واتحجزت يومين في العناية المركزة، وبعدها يومين في غرفة عادية، وخرجت الحمد لله، قدر ولطف".

وشدد محمد يسري، في رسالة  لجمهوره بضرورة الاهتمام بالصحة قائلًا: "مفيش أي ضرر دائم أو أي حاجة أتأثرت بشكل دائم، ولكنها تجربة صعبة أوي، أرجوكم متتهاونوش في الصحة، لأن الحقيقة إن الدكاترة كلهم قالوا إن مكنش ينفع أتأخر أكتر من كده".

كما قال أيضا: "أنا مكنتش عايز أقول إني في المستشفى لأني مكنتش عايز أقلق حد، أنا الحمد لله في بيتي وفي فترة نقاهة لمدة أسبوع، وهرجع تاني لشغلي وفي حاجات هعلن عنها قريب يارب تكمل على خير".

واستكمل محمد يسري حديثه: "حقيقي ربنا قدر ولطف، دائمًا في كل ابتلاء رحمة، لما طلعت من العناية المركزة وبدأت أجمع، كمية الناس اللي سألت وحابة تطمن عليا الحمد لله، وألف شكر وربنا يخليكم ليا".

واختتم حديثه قائلا: "كل الزملاء والأصدقاء، ونقابة المهن التمثيلية، والنقيب دكتور أشرف زكي، ألف شكر، مسابنيش ثانية، والفنان عزوز عادل حبيبي، ربنا يخليكم ليا وألف شكر".