تشهد غرفة خلع الملابس دائما العديد من الكواليس يحكيها اليوم وليد سليمان لاعب النادي الأهلي عن الأحداث التي وقعت عقب مباراة السوبر المصري 2020 والتي فاز فيها الزمالك بركلات الترجيح وتوج باللقب على حساب المارد الأحمر، وما تعرض له من ركل من قبل إمام عاشور لاعب الزمالك.
قال الحاوي خلال تصريحات تلفزيونية: "كل مدرب بيبقى مقسم المباراة لأكثر من جزء وكان كل تركيزنا نكسب المباراة مش نوصل ضربات الجزاء وكان واضح الزمالك كان عايز يوصل ضربات جزاء وروحنا باكتر من فرصة على مرمى الزمالك كان ممكن نخلص الماتش ولكن مكنش فيه توفيق ووارد ضربات الجزاء يحصل فيها اي حاجة واي فرقة كبيرة تخسر بضربات الجزاء لانها ضربات حظ".
تابع: "اللي حصل بعد الماتش انه كل اللعيبة الكبار كانوا برة الماتش انا وفتحي وشريف اكرامي عبد الله جمعة راح للجمهور وكهربا راح وراه ونزلت الملعب لقيت لعيبة الزمالك رايحة على السولية وكان محمود علاء جاي وقلت له خلاص الماتش خلص ومرة واحدة لقيت حد بيجري الظاهر اداري من الزمالك وبحاول ابعده عن كهربا لقيت نفسي بقع على الارض واللعيبة كمان جاية وفهموا اني بتخانق مش بهدي".
أوضح: "جالي عبد الشافي وعلاء وأمير مرتضى وقالولي متزعلش وحقك علينا وكنت زعلان للغاية واتعصبت، ونزل لي محمد فضل وقالي اهدى مينفعش احنا في بلد قلت عشان كده انا نازل اهدي وعشان لعيبة كبار مينفعش اتضرب، واللي بيحزنني لما تحصل لقطة زي كده الجمهور بيكبر في اللعيب الصغير اللي عملها في لعيب كبير وده كبير ولو لعيب اكبر مني او له تاريخ كبير مع المنتخب او النادي مينفعش".
شدد سليمان: "قلت للجنايني مينفعش يحصل فيا كده وقالي حقك هتاخده واهدى وقلت له انا هادي ولكن صعبان عليا نفسي اللي حصل ولعيبة الزمالك معظهم جم يكلموني وقالولي متزعلش ومنهم أمير وأحمد مرتضى ولكن اكيد لما شافوا اللي حصل اتضايقوا وزعلوا ومحدش اتبسط".
أضاف: "للاسف بعد احداث السوبر الناس اتكلمت في حتة تانية وكل واحد بيبرر لنفسه ولناديه والمفروض ما ابررش الغلط حتى لو على نفسه، والغلط غلط ومحصلش غلط من لعيبة الاهلي بخلاف اللي حصل من كهربا انه راح يعاتب عبد الله جمعة وقاله مينفعش تعمل كده، ولو عبد الله ماراحش لجمهور الاهلي مكنش هيحصل كده".
تابعوا أخبار بلدنا اليوم على Google News
