الفنان محمود عامر يكشف عن تعرضه لموقف مسيء من مخرج شهير

نشر الفنان محمود عامر، اليوم السبت، رسالة مؤثرة كشف خلالها طريقة تعامل البعض مع الفنانين والممثلين، وطريقة التعامل المسيئة من بعض المخرجين.

وقال "عامر" إنها العمل بالفن ليس له قواعد، وأن الشغل رزق وقسمة ونصيب لكل فنان.

وروى عبر "فيس بوك"، أن أحد الأشخاص قام بالاتصال به ولم يذكر اسمه، موضحًا أن هناك مخرج يريد أن يرى محمود عامر، ولن يحالفه الحظ بسبب تغيير المواعيد، ورغم ذلك تمالك محمود عامر، أعصابه لأنه كشخص بيحترم المواعيد واللقاءات التصويرية.

وتابع: "كل الحكاية ببساطة أن أنا فنان ودي شغلتى ومهنتى وعمري كله، حياتي كفنان فيها إخفاقات وإحباطات ونجاحات وربنا هو وحده مقسم الأرزاق".

وأضاف: "لكن فى ناس مُصرين على التعامل بشكل غير مرضى ومؤذى نفسيا مع الفنانين والواحد ما بيتعلمش للأسف الشديد، الحكاية أنهم كلموني في مكان ما على حاجة شغل يعنى واللي كلمنى قالى معلش المخرج عاوز يشوفك لأنه مش عارفك كويس، قلتله يدخل عالنت ويكتب اسمي ويشوف ويعرفنى، قالى معلش حضرتك عاوز يشوفك شخصيا لأنه محتاجك في حاجة معينة".

وأردف: "حاضر تمام رحت، وقدمت المطلوب وقابلت المساعد الأول، والمخرج مجاش، ويومين واتصلوا وقالولى من فضلك ابعتلنا مقاساتك فى اللبس وخلافه،وان شاء الله التصوير يوم الجمعه لو ظروفك سامحة".

وأكد: "تمام سامحة إن شاء الله لغاية الخميس بالليل لا حس والخبر سألت ايه الحكاية ياجماعة، قالولى معلش يا أستاذ المعاد بقا يوم السبت، فاضى إن شاء الله".

واستكمل: "تمالكت أعصابي وقلت إن شاء الله فاضي ماشى تمام، الجمعة بالليل كتبولي عالواتس معلش يا أستاذ محصلش نصيب الكلاينت معرفش ايه وبنعتذرلك يا أستاذ، وأحنا كمان بنعتذرلك".

وتابع: "عارف أنه مش رزقى، وعارف أنه كله نصيب، لكن الواحد يقول ايه فى الموقف ده، فعلا شغلتنا دى مدمره نفسيا، وعصبيا ومالهاش اى كتالوج، لكن برغم كل ده لسه عندى طاقة أقدر أقول أن بكره أحلى بإذن الله".

واختتم: "صباحكم خالي من المنغصات وكل الحركات والتعاملات الغير إنسانية".