معوض: كان مستحيل أكتب اسم مصطفى محمد في أي قائمة للمنتخب لو استمر الجهاز الفني

تحدث سيد معوض المدرب المساعد السابق لمنتخب مصر عن واقعة مصطفى محمد مهاجم جالطة سراي التركي في مباراة الجابون.

وصرح معوض خلال استضافته في برنامج الماتش الذي يقدمه الإعلامي هاني حتحوت عبر شاشة صدى البلد "لحد ما المباراة خلصت مكوناش شوفنا حاجة في الملعب، الانترنت كان سيء، وفي المطار شوفت الفيديو عن طريق حد معانا".

وتابع "اتضايقت جدًا من الموقف، مصطفى محمد لاعب كويس وأنا من اكتر الناس بتواصل معاها، مصطفى اخد الفرصة قبل محمد شريف".

واضاف "الي شوفته في المطار خلاني لا أراعي موقف مصطفى محمد بعدم اتمام انتقاله للدوري الفرنسي، مكنش في فرصة اننا نتجمع كجهاز فني، احنا رجعنا مصر مباشرًة وكله روح على بيته وبعد كدة تمت اقالتنا".

وواصل "محصلش اجتماع اصلا علشان نقدم شكوى او مذكرة ضد مصطفى محمد، لو كان في تجمع تاني عمري ما هكتب اسم مصطفى محمد في اي تجمع لحد ما يكون في اعتذار".