اتحاد الكرة يكشف تفاصيل واقعة عبد الرحمن مجدي في أولمبياد طوكيو

كشف أحمد حسام عوض عضو اللجنة الثلاثية التي تدير اتحاد الكرة كواليس واقعة عبد الرحمن مجدي خلال مشاركة منتخب مصر في أولمبياد طوكيو.

وقال عوض في تصريحات لبرنامج الماتش الذي يقدمه الإعلامي هاني حتحوت عبر شاشة صدى البلد "يوم مباراة الأرجنتين، جه مرافق البعثة بلغنا انه عاوزنا في أمر ضروري وقال ان احدى العاملات تقدمت بشكوى ضد لاعب في غرفة وذكر رقم الغرفة وان العاملة في حالة استياء شديد والموضوع قد يصل لتقديم بلاغ ضد اللاعب وقال ان التعامل معاها فيما معناه من اللاعب كان بشكل غير لائق".

وتابع "عبد الرحمن كان مطلوب للتحقيق وكان لازم نروح مباراة الأرجنتين، وقولنا في كاميرات في الفندق بس احنا محتاجين نروح المباراة".

وواصل "رواية عبد الرحمن مجدي ان البنت جت بتنضف الغرفة وحاول يديها زي بقشيش وهي اخدت الأمر ده بشكل ان في تعامل غير لائق، وقال ان ممكن علشان فرق اللغة ومش عارف يتكلم انجليزي وفرق الثقافة توقعت ان في امر غير طبيعي بيحصل".

وأضاف "عدنا من المباراة وعارفين ان في شرطة في الفندق، عبد الرحمن مجدي راح مع أحمد مجاهد لتحقيق الشرطة في القسم، والشرطة حرصت على أخذ اقوال عمار حمدي كسؤال في فندق الإقامة وعمار قال مشوفتش حاجة من الكلام ده وتم استبعاد عمار من الموضوع وانه غير متهم ".

وأردف عوض تصريحاته "التحقيق مع عبد الرحمن مجدي في قسم الشرطة استمرلمدة 5 ساعات متواصلة واللاعب كان بيأكد ان اختلاف اللغة هي السبب، عبد الرحمن اتسال نفس الأسئلة أكتر من مرة ولكن روايته كانت واضحة واكدها في كل مرة".

وأردف "الدور الي قاعد فيه اللاعب في الفندق موجود فيه الجهاز الفني وادارة اتحاد الكرة واللاعبين وفي أمن واقف في الدور أمام جميع الغرف، معرفش كان في كاميرات ولا لا في الدور، عبد الرحمن قال اكيد مش قصدي حاجة وحشة في وسط الناس دي".

واختتم عضو اتحاد الكرة "قبل مباراة استراليا بيوم، قالوا ان في تكملة تحقيقات في النيابة مع عبد الرحمن جم قعدوا معاه في الفندق، تحقيقات وصلت لمدة 4 ساعات تقريبًا، ولاثبات حسن نوايا عبد الرحمن اقترحنا ان اللاعب يقدم اعتذار مكتوب للفندق والدولة، وان الموضوع مش مقصود بالشكل ده".

Aa