"ومن الحب ما قتل".. تفاصيل مروعة لزوجة أمام محكمة الأسرة تطالب بحضانة أولادها

"لما بفكر فى الدنيا شكلها إيه من غيره، بحس إني هموت، ورغم إنه عماني بس بحبه" زوجة تقيم دعوى قضائية أمام محكمة الأسرة بإمبابة تطالب بحضانة أبنائها بعد 12 سنة زواج انتهت بالخلع، وتؤكدة أنها لم ترى أطفالها منذ 15 شهرا.

وتقول آية أمام محكمة الأسرة بإمبابة: "حلمت كتير أني ألبس الفستان الفرح الأبيض، وأتزف لعريسي زي كل البنات، ولشخص اللى اختاره قلبي، وعشان كده اتحديت أهلي اللي كانوا رافضين جوازي من حد غريب، كانوا عاوزين يضمنوا مستقبلي مع واحد وظيفته حكومية، لكن هددتهم بالإنتحار لو بعدوني عنه، فوافقوا".

وأضافت أمام محكمة الأسرة بإمبابة: "عشان ظروف جوزي عملنا فرح فى أضيق الحدود، ورضيت أعيش معاه فى أوضة بحمام، طبعا عشان افتكرت إن الحب هيخلي الأوضة جنينة، وعمري ماعاتبته على حرماني من الدنيا، بنام من غير أكل وأنا مبتسمة عشان ميتحملش فوق طاقته، لكن بعد شهر واحد من الجواز، اتحول الملاك اللي حاربت أهلي عشانه، لوحش بيضربني على أتفه الأسباب، عمري ماتخيلت إن الراجل اللي كنت هموت نفسي عشانه هو اللي هيموتني".

وتابعت آية أمام محكمة الأسرة بإمبابة: "رغم كل ده ولسه في أول شهر زواج حاولت أعيش وأتحمل الوجع منه والجروح اللي مالية جسمي، وقررت إني مش هرجع بيت أهلي عشان محدش يشمت فيا، ويعاتبني، وخلفت أول بنت، ومن بعدها التانية، وكانوا هدية ربنا ليا وعوضوني عن مأساتي مع جوزي، وطبعه أصعب من الأول، وكل مرة بكون فيها تحت إيده بيموتني، لحد ما أصابني بارتجاج فى المخ، وكملت معاه تاني، عشان خوفي من شماتة أهلي" .

واضافت: "بعد كل ده دخل عليا بضرة، وكانت الصاعقة بالنسبة ليا، وكانت بتعاملني زي الخدامة، وكانت بتعذب عيالي وتحرقهم، وهو يزود المرار ويضربني لو اعترضت، لحد ما بدأ يسمع كلامها ويتاجر فى المخدرات مع اخواتها".

وتابعت أمام محكمة الأسرة بإمبابة: "دخل البيت أول يوم العيد، وكنت منضفاه ومفيش أي حاجة ناقصة، فتح التلاجة ومكنش فيه مياه باردة، اتعصب ونزل فيا ضرب بالحديدة على دماغي، ومحستش بنفسي غير وانا فى المستشفي وأهلي حواليا".

وأضافت: "بعد ما اهلي شفوني في المستشفى ساعتها طلبوا منه يطلقنى بعد ما الدكتور قال إن ممكن يصيبني العمى قريب بسبب الضرب علي دماغي، بس هو رفض يطلقني، فرفعوا ضده دعوى خلع، فانتقم وخطف ولادي مني ولحد دلوقتي مش عارفة أشوفهم".

وقالت آية: "كل اللي شوفته ده اتحملته كان عشان خاطر ولادي وخلاص هتعمي بسبب حبي ليهم وليه، عارفة إنه هيحرمني منهم عشان كده كنت خايفة أطلق، مش عاوزة حاجة غيرهم رجعولى ولادي".

أقرأ أيضا..

نار الغيرة.. قصة سيدة قتلت "سلفتها" بـ 5 طعنات في الشرقية

شاهد.. لحظة اندلاع حريق هائل بمخزن للقمامة بالخصوص

بطريقة بشعة.. كورونا تنهي حياة زوجين