"بلبل" عن سرقة قناة الشرق لحق إذاعة أمم أفريقيا من بين سبورت: " المصالح بتتصالح"

هنأ الفنان حسن بلبل فوز المنتخب الجزائري ببطولة كأس الأمم الإفريقية، قائلاً:" ألف مبروك للشعب الجزائري ومنتخب الجزائر، وبالطبع احنا فرحانين لأن برده دي بلد شقيق، وماحدش يحط في دماغه اننا زعلانين عشان خاطر الجزائر خدت، وفي ناس منهم شتمت وعملت حوارات، فمش معنى إن في ناس شتمت وهما أقلية يبقوا هما دول بيمثلوا دولة الجزائر، لإننا مافيش بيننا وبين الجزائر أي حاجة وحشة.

وعبر"بليل" عن امتنانه للتنظيم الرائع للبطولة، قائلاً: " ومبروك لأم الدنيا مصر على التنظيم الجميل والافتتاح الأكثر من رائع ويشرف أي حد مصري، واللي كل القنوات جابته، حتى القناة الشمال، هي قناة شمال بس اسمها الشرق، كانت مبسوطة جداً بالافتتاح، وأذاعته مرتين"، مبدياً تعجبه من ذلك بقوله:" احنا كده عاجبينكم ومأثرين فيكم، يعني الافتتاح عجب الخونة كلهم، وقناة الشمال، أسف الشرق اللي فوق دي عجبها الموضوع وعمالة تذيع في الافتتاح، يا سلام الله".

وواصل: " بس أنا اعرف ان الافتتاح والحاجات دي تبع قناة بين سبورت، أنتم ذعتوها ازاي، سرقة كده عادي، يا ولاد الحرامية، ده السعودية بجلالة قدرها جايبة قناة زي بين سبورت، وعاملة نفس الموضوع ، وفي خلافات وقواضي وبلاوي زرقاء، انتم يا قناه الشرق اللي فوق بسهولة كده تذيعوا الافتتاح عادي سرقة عادي الله، يا جماعة مش قناة الشرق دي كانت على طول قال الله وقال الرسول وحرام وحلال، واللي بيتعمل فالشعب حرام، وناس كتيرة مغيبة بتمشي وراكم، أما هو حلال انتوا ازاي سرقتوا الافتتاح من قناة بين وعرضتوه عندكم، ولا هو حلال ليكم وحرام لينا وللسعودية، أه اوعوا تكونوا متفقين مع القطرية، عشان تبقوا ضدنا وضد السعودية وضد كل حد مؤيد للدولة ديا، عشان كده الخيانة فيها مصالح، يعني ساعة الخيانة المصالح بتتصالح"