طرح المخرج بيتر ميمي الأفيش الدعائي لفيلم كازابلانكا والذي تصدره الفنان أمير كرارة وغادة عادل والممثل التركي خالد ارغنيش وإياد نصار وعمرو عبد الجليل وأحمد داش، مما جعل أكرم ابن الفنان محمود البزاوي يعترض لعدم وجود صورة والده على الأفيش، وجاء ذلك عبر حسابه الشخصي على موقع التواصل الاجتماعي "فيس بوك".
وكتب أكرم محمود البزاوي، "مبدأيا أبويا ماعندوش أي فكرة عن البوست ده، أنا أبويا طيب ويمكن طيبته دي هي اللي كانت سبب في تأخير نجاحه وإنه كتب من الباطن كتير مثلاً زي ما قولت قبل كده وكان دايما بيعمل حاجات وتنجح ومفيش حد يعرف ‘نه لي دور في نجاح العمل ده بس اللي كان بيصبره إن ربنا هيعوض.. وبعد ما قدر يوصل بدراعه للي هو فيه لسه في ناس مش مقتنعه بيه.. بس ده حقهم لأن مفيش حد عليه إجماع بس طالما مش مقتنع بحد يبقى ماتحرجوش وابعد عنه أحسن لأنه في نظرك مش الشخص اللي يفيد".
وتابع "أكرم"، قائلاً: "في رأيي الشخصي ناس كتير بتعرف تتصور بس مش الكل بيعرف يمثل.. وآسف لو كنت منحاز أوي في كلامي لأبويا بس زي ما قولت ده أبويا اللي نجاحه بيسعدني أكتر ما بيسعدني نجاحي".
واختتم "أكرم"، حديثه قائلاً: "أبويا قالي إنه عامل دور مهم في الفيلم ده.. و يمكن بيكدب عليا وطالع كومبارس.. ساعتها هتأسف على البوست".
وحرص عدد من نجوم الفن على مساندة محمود البزاوي وكتبوا تعليقاتهم على كلام أكرم ابنه، فكتب صبري فواز: "يا أكرم أبوك فنان كبير .. حقك تفرح وتفخر بيه.. واحنا زملاؤه بنفخر بيه و بشغله"، كتب أحمد السعدني: "مش بالأفيشات يا ابني لأبوك ممثل وأب وإنسان عظيم".
كما كتب الفنان الكبير صلاح عبد الله: "تعرف ياواد يا أكرم أنا بحب حبك لأبوك قوي قوي ومعجب بيه لأقصى درجة وبدعيلك وبدعيله وأبوك استحمل كتير وربنا كبير والحمدلله في الفترة الأخيرة كل الناس بتشاور بكل التقدير والاحترام والإجلال لمحمود البزاوي واللي جاي أحلى وأعظم بإذن الله بغض النظر عن الأفيش".
تابعوا أخبار بلدنا اليوم على Google News
