سناء الشريف تكتب: كلنا بنغلط مفيش إنسان كامل

مفيش انسان كامل ولا انسان مابيغلطش.. وكل واحد فينا جواه علي الاقل 3 شخصيات بيحاربوا بعض.. الموضوع مش موضوع صراع عقل وقلب لا ده صراع بين تربيه ومبادئ وواقع شايفينه زباله وكل حاجه فيه مباحه وخلقت جوانا شيزوفرينيا فكريه وال3 شخصيات دول واحد فيهم طفل يحب يلعب ويتنطط ويتمرد وبيطلع جوانا لما بنكبر.. في حاله الوصول للعشق بنتحول تاني لاطفال وفي حاله الوصول لسن العجز بنتحول تاني لاطفااااال.

الشخصيه التانيه تعتمد علي المشاعر وعلي حسب الطفل اللي جواك هتكون.. بمعني لوطفل متمرد هتبقي شخصيتك هنا قاسيه ولو طفل بيحب يعمل كل حاجه براحته هتكون عفوي ومليان عشم اما الشخصيه التالته.. فهي شخصيه عمليه بحته كل حاجه بالعقل زي اله مبرمجه علي الصح وقوانين ومبادئ.. وديه اللي بتخليك كل ماتغلط تبقي عايز تجلد نفسك.. الشخصيه ديه هي اللي بتبني الجزء المنعزل جواك واللي بتخبي فيه كل اسرارك واخطاءك وهفواتك.

فاعلي حسب الحاله والموقف شخصيه واحده بس هي اللي بتطلع بس المشكله لما تقعد لوحدك ال3 شخصيات بيحاسبو بعض.. لازم تقعد مع نفسك تمسك كل حاجه جواك تعباك وتبتدي تسأل نفسك انا مين في ال3 سيطر عليا.. ردود فعلي بتاخد اي شكل فيهم.. اسأل وجاوب.. شوف مين فيهم اللي تاعبك وحاول تقلل من ردود فعله.. اتعرف علي نفسك عشان تعرف تتعامل علشان تعرف تعدي مرحله المنتصف المميت.. علشان حياتك تكمل بالشكل الصح. .... علشان انت اكيد تستاهل الصح..