سناء الشريف تكتب.. الإصلاح يا ريس

الاصلاح يا ريس لابد منه لانه اخطاء سنوات كتير مضت .. لكن .. تعالى يا ريس اقولك تجيب فلوس منين.

اولا وقف العلاوه الدوريه لمن يزيد راتبه عن 20 الف جنيه لمدة 3 سنوات وده هيوفر 5 مليار جنيه ولمن يزيد عن 30 الف لمدة 5 سنوات وده هيوفر مثلهم ولمن يزيد عن 40 الف لمدة 7 سنوات وده بردو هيوفر مثلهم ومن يصل راتبه اكتر من 100 الف الى مليون بالحوافز تكون الضريبه 40% انت مستغرب ليه فى فعلا رواتب كده قى البترول والكهرباء والاتصالات والبنوك ومستشارين مجلس الدوله اللى بيشتغلوا مستشارين للشركات والوزارات وهديكم مثل المستشار اللى انتحر بتاع قضية الرشوه ومغارة على بابا قال فى التحقيقات ان دخله الشهرى حوالى 200 الف جنيه لانه مستشار المصريه للاتصالات وغيرها وده هيوفر حوالى 3 مليار جنيه وتخفيض عدد مستشارى الوزارات الى 10 % هيوفر 20 مليار مش كل وزير عنده 20 مستشار بعربيه وسواق وبمكافئه غير مقيده هيوفر كده اكتر من 30 مليار السنه دى .

ثانيا استخدام كروت البنزين ورفع الدعم نهائى عن السفارات الاجنبيه والشركات الدوليه والمدارس الدوليه وحسب احصائية الحكومه هيوفر 11 مليار دعم محروقات لمن لم يستحق والعربات الفارهه بدون دعم والاقل منها دعم 20% وتنزل متدرج حتى يكون اقصى دعم للملاكى اقل من موديلات سنة 2000  فيكون 80 % فهتوفر حوالى 25 مليار اجمالى وكده انت وفرت 60 مليار من اعادة هيكلة الدعم .

ثالثا بطاقة التموين تدرج فيها الفئة المدعومه مش ممكن يكون اللى دخله 2000 جنيه مثل اللى دخله 10000 جنيه واكتر يبقى ده التهريج بعينه فعلى الاقل هتوفر 12 مليار .

ثالثا والاهم بس ده عايز راجل دكر يصدر قرار

سيارات الشرطه والجيش التى يستعملها الضباط لقضاء احتياج المنزل علاوة على ذلك ان تلك السيارات تستعمل فى دروس الأبناء وسوف توفر مبلغ ماليه سوف يقشعر لها الابدان وليعلم كل مسؤل انها ليست عزبه.

رابعا الابراج والعمارات المخالفه يتم تقنين اوضاعها والفاسد منها هدم علطول والباقى تحصيل المخالفات هيجيب على الاقل الف مليار وطبعا لجنة استرداد الاراضى نايمه فى العسل ومش بتنتهى من التسويات والنبى يا ريس اشخط فيهم او اديها للجيش ينهى الشغلانه دى ويدخل خزينه الدوله على الاقل 500 مليار جنيه .

خامسا إلغاء نشاط كل أندية الشركات والمؤسسات مثل انبى وبتروجت والمقاولون واتحاد الشرطه وغزل المحله والقناه وبورفؤاد وحرس الحدود وطلائع الجيش والداخليه الاتصالات والرباط وانوار السفن والاعلامين وجاسكوا وبترول اسيوط والنصر للتعدين والخ لتوفر مليارات من عقود لاعبين ومكافأت وبدل سفر وملابس وشهريات وفنادق وسفريات.

سادسا الساده اعضاء مجلس الشعب التى لم أري لهم اى قرار لصالح الفقير ولم ألاحظ على أيا منهم اى تفاعل مع الشعب أرجوك يا ريس إلغاء كل الحوافز ومكافأة كل جلسه وأعطى اوامرك لسحب كل الأموال التى استلموها من مجلس الشعب لعدم استفادة الشعب من اى قرار وعدم صلاحيتهم فى هذا التوقيت الصعب  .

سابعا تعديل رواتب شركات البترول والغاز وهيئة قناة السويس ومجلس الدوله لوجود فارق كبير بين مرتباتهم ومرتبات موظفى قطاع الاعمال والقطاع العام من مدرسين وموظفين  والله ها توفر أموال با العبيط .

احنا مش دوله فقيره انما ثرواتنا منهوبه وسوء الاداره وجبن المسئولين مخلي الشعب فقير وبيئن .