مي القاضي: في ستات كتير بتخون وصيد العقارب ليه حتة في قلبي

كشفت الفنانة مي القاضي، تفاصيل دورها في مسلسل «صيد العقارب» مع غادة عبد الرازق و«رحيل» مع الفنانة ياسمين صبري.

قالت مي القاضي، خلال استضافتها في برنامج الستات والذي يقدمه كلًا من الإعلامية مفيدة شيحة وسهير جودة عبر قناة النهار، «في ستات كتير بتخون بس في رحيل أنا مكنتش خاينة، في رحيل هي اتظلمت جامد فقررت تاخد حقها وإنها مش هتبقى ضعيفة وهتاخد حقها غصب عن أي حد".

وعن توقيت اختيارها للأدوار، قالت كاشفة: صيد العقارب كان الأول وبعده رحيل"، موضحة: "الدورين كانوا مختلفين جدًا عن بعض، بحب جدًا صيد العقارب وليه حتة في قلبي لوحده وبحب كواليسه".

وتابعت: "رحيل بحب الدور لإنه كان دور في دراما تقيلة، كانت بنت شعبية وده بعيد عني شوية فبيبقى تحدي أكتر وده بيخرج من الممثل أحلى".

تحدثت مي القاضي عن سبب حبها لكواليس مسلسل صيد العقارب، قائلة: "الأجواء كانت حلوة وهي حاجة مالهاش أسباب كانت أحلى كواليس صيد العقارب"، مضيفة: "غادة عبد الرازق ممثلة قوية جدًا، وبيبقى فيه ممثلات أقوياء بس بتبقى اهتماماتهم باللبس وبالفاشون مش قد غادة عبد الرازق فأنا بحب التركيبة بتاعتها هي فيها كل حاجة". 

أوضحت طبيعة شخصيتها،«لحد السنة اللي فاتت كنت خجولة الا قدام الكاميرا ده بالنسبالي المساحة اللي باخد وعن طبيعة شخصيتها فيها راحتي وأنا بعمل شخصية حد تاني، وحاسة إني اتغيرت».

وأشارت عن سهولة العمل في الوسط الفني، : "لا مش سهل شغلنا مش سهل خالص كل خطوة اللي بعدها أصعب دايمًا، بدايتي كانت سهلة لكن المشوار مكنش سهل، ولازم طول الوقت أشتغل على نفسي".