علق الإعلامي عمرو أديب، علي خسارة نادي الزمالك من إنبي بهدفين مقابل لا شيء، ضمن مباريات بطولة الدوري العام، ليحتل الأبيض المرتبة الخامسة في جدول الترتيب.
وقال عمرو أديب خلال لقائه ببرنامج “الحكاية” المذاع علي قناة “mbc مصر”: "فرقة الزمالك تعلم أنها تلعب في نادي كله مشاكل وخناقات جوا وعقود بتتسرب ورئيس نادي مش عارف عامل ايه هي خلاص فرطت من الزمالك ومفيش زمالك".
وتابع: "احنا النهاردة بنقابل فرقة نازلة درجة تانية وبيناضل من أجل البقاء، فين اللاعيبة اللى انت اشتريتها، وفين أحمد بلحاج ومنسي ولا ليهم اي معنى وفي نهاية الأمر أنت فريق بلا فعالية".
وأضاف: "الأهلي سيئ بس بالنتيجة هو أول الدوري، انت واصل انك مش عارف تبقى رابع الدوري، عندنا ربع فرقة مشكل كانوا عظماء من شيكابالا وإمام عاشور وبن شرقي وطارق حامد مش موجودين، وبقينا فرقة محطكة وفيريرا أيامه بقت معدودة وقاعد علشان العقد وياخد رقم وقدره لو مشيته، 5 هزائم وراء بعض انا مش فاهم فيه ايه؟ ازاي الكورة عندنا بقى مستواها عامل كده؟ سيبك من الأهلي اهو عنده حاجة يتكلم فيها انما احنا نتكلم في ايه؟ انما الزمالك حالة من حالات الاستسلام وانت لا عارف تضغط من قدام ولا من وراء وشباب انبي بياخدوا الكورة من نصف الملعب لقدام ولاعيبة الزمالك مش عارف تجاريهم، احنا وصلنا للمستوي ده ليه؟ وبقينا عاملين كده ليه؟".
وأكمل:"طبعا بعد الخسارة من إنبي هيبقى فيه مليون شماعة لمسئولي الزمالك ومنها السحر واتحاد الكرة والأهلي مش عارف ايه، اصل الحكاية الفريق بقى سيئ جدا من مدة وفيريرا عنده احساس انه بيشتغل وخلاص وبيقبض بالدولار، اجيبلك مين تاني تلاعبه اقل من فريق بينافس علي البقاء، الجمهور قاعد بيشجع من اول الماتش لاَخر واللى يسمع التشجيع يقولك الفرقة دي كسبانة أربعة ويهتفوا صولات وبطولات وإنجازات ده ازاي يعني؟ ربنا بينتقم مني علي هجومي علي الأهلي امبارح، وخلاص بقى اركز في أرسنال والسيتي واشوف ريال مدريد وليفربول هيعملوا ايه احسن، اللى جاي شكله مش لطيف للزمالك، مشيت لاعيبة وجيبت لاعيبة وايه النتيجة يعني صفر كبير".
تابعوا أخبار بلدنا اليوم على Google News
